नेचासल्यानमा सकियो, तीन दिने बिषयगत शिक्षक तालिम

मंसिर ६, सोलुखुम्बु । सोलुखुम्बुको नेचासल्यान गाउँपालिका सञ्चालित तीन दिने बिषयगत शिक्षक तालिम सम्पन्न भएको छ । हिमाल दर्शन माध्यमिक विद्यालय रीड नेपालको आयोजना तथा नेचा सल्यान गाउँपालिकाको समन्वय तथा सहकार्यमा संचालित शिक्षकको पेशागत विकास तालिम सम्पन्न भएको हो ।

तालिममा अंग्रेजी गणित विज्ञान, सामाजिक विषयलाई समावेश गरिएर प्रशिक्षण गरिएको रीड नेपालले जनाएको छ । तालिम समापन रीड नेपालका शिक्षा विकास संयोजक केशवदेव गिरीको अध्यक्षता तथा गाउँपालिका उपप्रमुख बिना राईको प्रमुख आतिथ्यतामा गरिएको थियो । समापन कार्यक्रममा शिक्षा शाखा प्रमुख माधवमणि ढुंगानाले सिकेका सीप व्यवहारमा उतार्न आग्रह गर्दै आयोजक रीड नेपाललाई तालिम संचालनका लागि धन्यवाद व्यक्त गर्नुभयो ।

यस्तै पालिका उपप्रमुख बिना राईले शिक्षामा रीड नेपालको भूमिका अतुलनीय रहेको भन्दै तालिम प्रभावकारी रहेको भन्दै शैक्षिक सुधारका लागि रीडसंग सहकार्य गरेर अगाडी बढिरहेको र आगामी दिनमा पनि निरन्तरता दिने बताउनुभयो ।

रीड नेपालका शिक्षा विकास संयोजक केशवदेव गिरीले तालिमले मार्ग निर्देशन गर्ने भएकोले तालिमबाट पुरा नभएका अपेक्षाहरुलाई शिक्षक आफैंले पनि खोज अनुसन्धान गरेर सिक्न सकिने बताउदै आइ सी टी को प्रयोगमा जोड दिएर शिक्षण गर्न आग्रह गर्नु भयो । तालिममा ६५ जना शिक्षकहरुको सहभागिता रहेको थियो ।