सोलु—सल्लेरी आक्रमणको २४ वर्ष, १४ जना विद्रोही र ५० औँ राज्यपक्षको हत्या भएका त्यो दिन

मंसिर १०, सोलुखुम्बु । तत्कालीन माओवादीको जनमुक्ति सेनाले सल्लेरी आक्रमण गरेको आज २३ वर्ष पुरा भई २४ वर्ष लागेको छ । २०५८ साल मंसिर १० गते तत्कालीन माओवादी जनमुक्ति सेनाको २ हजार भन्दा बढीको संख्यामा आएको मोर्चाले सोलुखुम्बु सदरमुकाम सल्लेरीका सबै सरकारी कार्यालय नेपाली सेनाको गण बाहेक कब्जामा लिन सफल भएको दिन आज २४ वर्ष पुगेको छ । उक्त आक्रमणमा माओवादी तर्फका जनमुक्ति सेनाबाट १४ जनाले सल्लेरी आक्रमणमा ज्यान गुमाएका थिए भने नेपाल सरकारका तर्फबाट जिल्ला प्रशासन कार्यालयका तत्कालीन प्रमुख जिल्ला अधिकारी बुद्धिसागर त्रिपाठी सहित ४४ जना प्रहरी लगायत अज्ञात सेनाहरूको ज्यान गएको थियो ।

जनमुक्ति सेनाले सोलु सल्लेरी आक्रमण गरेको आज २४ वर्ष लागेको स्मरणमा नेकपा माओवादी केन्द्रले प्रथम सोलु सल्लेरी जनमुक्ति मोर्चा दिवस मनाएको छ । नेकपा माओवादी केन्द्र जिल्ला समन्वय समिति सोलुखुम्बुका संयोजक नाम्ग्याल शेर्पाको अध्यक्षतामा कार्यालयमा दिप प्रज्वलन गरि तत्कालीन जनमुक्ति सेनाका सदस्यहरुलाई सम्मान गर्दै दिवस मनाएको हो । माओवादी आन्दोलनको ऐतिहासिक दिनको रुपमा स्मरण गर्दै हरेक वर्षको मंसिर १० लाई सोलु सल्लेरी मोर्चा स्मृति दिवसको रुपमा मनाउने सुरुवात माओवादी सोलुखुम्बुले गरेको जनाइएको छ । स्मृति दिवसको अवसरमा आयोजित एक कार्यक्रममा बोल्दै नेकपा माओवादी केन्द्र जिल्ला समन्वय समिति सोलुखुम्बुका संयोजक शेर्पाले यो ऐतिहासिक आन्दोलनका योद्धाहरू र सहयोगीहरुलाई सम्मान गर्दै यो दिवसलाई हरेक वर्ष मनाउने बताउनुभएको छ ।

यस्तै कार्यक्रममा बोल्दै नेकपा माओवादी केन्द्रका नेता तथा महाकुलुङ गाउँपालिकाका पूर्व अध्यक्ष तथा काेशी प्रदेश समिती सह सचिव  सागर किराँतीले सल्लेरी आक्रमणमा ज्यान गुमाउने सबै जनमुक्ति मोर्चाका सेनाहरुलार्ई सम्मान गर्नुपर्ने भन्दै उक्त आन्दोलनलाई हिंसाको संज्ञा दिने दुस्साहस नगर्न चेतावनी दिनुभयो । उहाँ आन्दोलन संस्थागत सोचे अनुरुप हुन नसकेपनि माओवादीको आन्दोलन अझै पनि जारी रहेकोले संस्थागत हुनेमा विश्वास व्यक्त गर्नुभयो ।

उक्त आन्दोलनमा प्रत्यक्ष संलग्न भई लडेका घनश्याम नेपालीले आन्दोलन पछि नेपालमा ठुलो परिवर्तन भएको भन्दै उक्त आन्दोलनको जगमा अहिलेको लोकतान्त्रिक नेपाल यहाँ सम्म आएको बताउनुभयो ।