खुल्ला महिला फुटवल प्रतियोगितामा हलेसी ७ च्याम्पियन

मंसिर १०, सोलुखुम्बु । खोटाङको हलेसी तुवाचुङ नगरपालिकाले आयोजना गरेको खुल्ला महिला फुटवल प्रतियोगितामा हलेसी ७ महादेवस्थान च्याम्पियन बनेको छ । टाइब्रेकर सुटआउटमा ३–२ ले पद्‍मा स्पोटर्स् क्लब ओखलढुंगालाई पराजित गर्दै सोमबार हलेसीले उपाधि चुमेको हो ।

निर्धारित समयमा दुबै टिमबाट गोल नभएपछि खेल ट्राइबेकरमा गएको थियो । ट्राइबेकरमा हलेसीले ३ गोल गर्दा ओखलढुंगाले २ गोल गरेका थिए । विजेता टिमले नगद १ लाख १० हजार १ सय ११ रुपैयाँसहित ट्रफी, मेडल र प्रमाणपत्र पाएको छ । उपविजेता पद्‍मा स्पोर्ट्स क्लब ओखलढुंगाले ५५ हजार ५ सय ५५ रुपैयाँ नगदसहित ट्रफी, मेडल र प्रमाणपत्र पाएको छ ।

सेमिफाइनलिस्ट जन्तेढुंगा गाउँपालिका र भोजपुर नगरपालिका–१० ले २२ हजार २ सय २२ रुपैयाँसहित प्रमाणपत्र पाएका छन् । विजयी टिम र उत्कृष्ट खेलाडीहरुलाई कोशी प्रदेशका सामाजिक विकासमन्त्री पाँचकर्ण राई पीके, हलेसी तुवाचुङ नगरपालिकाका मेयर बिमला राई र उपमेयर रमेश कुमार राउतले पुरस्कार वितरण गरेका थिए ।