मंसिर १४, सोेलुखुम्बु । हिमाली जिल्ला सोलुखुम्बुमा अन्तराष्ट्रिय महिला मानव अधिकार रक्षक दिवस भव्यताका साथ मनाईएको छ । शुक्रबार सोलुदुधकुण्ड नगरपालिका, रीड नेपाल, सामुदायिक वन उपभोक्ता महासंघ र जिल्ला अस्पताल फाप्लुको सहकार्य तथा महिला मानव अधिकार रक्षकहरुको जिल्ला सञ्जाल सोलुखुम्बुको आयोजनामा भव्यताका साथ दिवस मनाइएको हो ।
महिला मानव अधिकार रक्षकहरुको जिल्ला सञ्जाल सोलुखुम्बुका अध्यक्ष राधीका श्रेष्ठको अध्यक्षता तथा जिल्ला समन्वय समितीका प्रमुख कृष्ण प्रसाद निरौलाको प्रमुख आतिथ्यतामा मानव अधिकार रक्षकहरुको पहिचान : महिला हिंसा विरुद्धको अभियान भन्ने मुल नाराका साथ दिवस मनाईएको जनाइएको छ ।
कार्यक्रमलाई सम्बोधन गर्दै जिल्ला समन्वय समिती सोलुखुम्बुका प्रमुख कृष्ण प्रसाद निरौलाले शारीरिक, मानसिक, सामाजिक साँस्कृतिक, आर्थिक तथा यौनिक रुपमा असर पर्ने गरि हुने हिंसालाई लैङ्गिक हिंसा भन्ने गरिएको भन्दै समाज परिवर्तन गर्नका लागि स्वयम आफू परिवर्तन हुन जरुरी रहेको बताउनुभयो । यस्तै महिला मानव अधिकार रक्षकहरुको जिल्ला सञ्जाल सोलुखुम्बुका अध्यक्ष राधीका श्रेष्ठले पिडितहरुको समस्यालाई न्याय दिन नसकेपनि सम्बन्धित निकाय सम्म पुयाउने काम गरिरहेको बताउनुभयो ।
यस्तै सोलुदुधकुण्ड नगरपालिकाकी उपमेयर गान्धी माया तामाङले लैंगिक हिंसा अन्त्य गर्नका लागि विभिन्न वडामा कार्यक्रम सञ्चालन गरिने बताउनुभएको छ । यता जिल्ला प्रहरी कार्यालय सोलुखुम्बुका प्रहरी प्रमुख एवंम प्रहरी नायव उपरीक्षक द्धारिका प्रसाद घिमिरेले जिल्लामा आर्थिक बर्ष २०८०/०८१ मा ७ वटा लैंगिक हिंंसा सम्बन्धि उजुरी दर्ता भएको बताउनुभयो । उक्त उजुरीहरु समाधान गरिसकिएको उहाँको भनाई छ ।
रीड नेपालका शिक्षा विकास संयोजक केशव देव गिरीले लैंगिक हिंसा भने लिंगका आधारमा गरिने हिंसा भएकाले महिला, पुरुष दुवैलाई सम्मान गर्न आवश्यक रहेको बताउनुभयो । साथै रिड नेपालले विभिन्न स्थानीय तहमा शिक्षक, विद्यार्थीहरुलाई दिदै आएको तालिमहरुमा समेत लैंगिक हिंसा न्युनिकरण सम्बन्धी विषय वस्तु समावेश गर्दै आएको बताउनुभयो ।
Discussion about this post