५ शैय्याको अस्पताल र पोस्टमार्टम केन्द्र स्थापना गर्न मन्त्री पौडेलसँग पार्टी सभापति र वडाध्यक्ष शेर्पाको माग

मंसिर १७, सोलुखुम्बु । सोलुखुम्बुको खुम्बु पासाङल्हामु गाउँपालिका वडा नम्बर एकका वडा अध्यक्ष फुनुरु शेर्पाले स्वास्थ्य मन्त्रीसँग ५ शैय्याको अस्पताल र पोस्टमार्टम केन्द्र स्थापना गर्न माग गर्नुभएको छ । वडामा ५ शैय्याको अस्पताल र गाउपालिकाको केन्द्रमा पोष्टमार्टम केन्द्र स्थापना गर्न स्वास्थ्य तथा जनसंख्यामन्त्री प्रदीप पौडेलसँग माग गर्नुभएको हो । वडाध्यक्ष फुनरु शेर्पा र नेपाली कांग्रेस वडा नम्बर ५ का पार्टी सभापति मिङ्मा शेर्पाले मन्त्री पौडेललाई भेटी अस्पताल र पोस्टमार्टम केन्द्र स्थापनाको लागि निवेदन दिनुभएको हो ।

वडा नम्बर १ मा अस्पताल नहुँदा सर्वसाधारणले स्वास्थ्य सेवा पाउन कठिन भएकोले मन्त्री पौडेलसँग अस्पताल निर्माणको पहल गरिदिन आग्रह गरिएको वडाध्यक्ष शेर्पाले बताउनुभयो । वडाध्यक्ष शेर्पा र पार्टी सभापति शेर्पाले मंसिर १७ गते मन्त्री पौडेललाई भेटेर निवेदन दिनुभएको हो । खुम्बु क्षेत्र पर्यटकीय दृष्टिले अति नै महत्वपूर्ण क्षेत्र भएको र सो क्षेत्रमा दुर्घटना जस्ता दुःखद अवस्थाको कारण स्वेदशी तथा विदेशी पर्यटक तथा स्थानीयको मृत्यु भएमा पोस्ट मार्टम गर्न सदरमुकाम फाप्लु लैजान समस्या भएकोले पोस्ट मार्टम केन्द्र स्थापना आवश्यक रहेको सभापति शेर्पाले बताउनुभयो ।

खुम्बु क्षेत्र पर्यटनको हिसावले अति नै महत्वपूर्ण क्षेत्र भएको भन्दै पर्यटक वा स्थानीयको कुनै कारण मृत्यू भएमा पोस्ट मार्टम अनिवार्य हुन्छ । पोस्ट मार्टमको लागि जिल्ला सदरमुकाम फाप्लु नै लानुपर्ने वाध्यता रहेको उल्लेख गर्नुभयो । पोस्ट मार्टमको लागि लास सदरमुकाम लान निजी गाडीले नमानेको साथै हेलिकोप्टरले पनि नमान्ने र माने पनि भाडा अति नै महंगो हुने गरेको छ ।

सोही कारण गाउँपालिकाको केन्द्रमा पोस्ट मार्टम केन्द्र स्थापना गर्न पहल गरिदिन मन्त्री समक्ष आग्रह गर्नुभएको छ । एक नम्बर वडामा ५ शैय्याको अस्पताल बनाउनको लागि जग्गा प्राप्तिको प्रक्रिया अघि बढिसकेको छ । सो अस्पतालको लागि जग्गा प्राप्ति गर्न ३० लाख रुपैयाँ बजेट विनियोजन गरिएको वडाध्यक्ष शेर्पाले जानकारी दिनुभयो ।