ओखलढुगांको मोलुङ –५ को वडा अध्यक्षमा एमालेका तामाङ विजयी

मंसिर १७, सोलुखुम्बु । ओखलढुगांको मोलुङ गाउँपालिका –५ को वडाध्यक्षमा नेकपा एमाले विजय भएको छ । निर्वाचन अधिकृतको कार्यालयका अनुसार एमाले उम्मेदवार गंगाबहादुर तामाङ ३९९ मतसहित विजयी भएका हुन् ।

निकटतम प्रतिद्वन्द्वी नेपाली कांग्रेसका घनश्याम दाहाललाई २२२ मतले पछि पार्दै तामाङ विजयी हुनुभएको छ । एमालेका तामाङले ३९९ मत प्राप्त गर्दा कांग्रेसका दाहाले १७७ मत प्राप्त गर्नुभएको छ । आइतवार सम्पन्न उपनिर्वाचनमा राष्ट्रिय स्वतन्त्र पार्टीका बिष्णुप्रसाद पोखरेलले १५१ मत प्राप्त गर्नुभयो ।

यस्तै, नेकपा (माओवादी केन्द्र) का मानबहादुर सुनुवारले २३, राष्ट्रिय प्रजातन्त्र पार्टीका चन्द्रमणी दाहालले ३, जनता समाजवादी पार्टीका इन्द्रबहादुर दर्जीले ३ मत प्राप्त गर्नुभएको मुख्य निर्वाचन अधिकृत गिरीराज गौतमले जानकारी दिनुभयो । कुल ७ सय ६८ मत खसेकोमा १२ मत भने बदर भएको अधिकृत गौतमले जानकारी दिनुभयो ।

कुल १३ सय २५ मतदातामध्ये ७६८ जनाले मतदान गरेका थिए । जिल्ला समन्वय समिति प्रमुखमा भने नेपाली कांग्रेसका टेकराज भट्टराई निर्विरोध निर्वाचित हुनुभएको छ । जिसस प्रमुख डिल्लीराम खनाल र मोलुङ–५ का वडा अध्यक्ष गोपिकृष्ण कार्कीको निधन भएकाले ओखलढुङ्गामा उपनिर्वाचन भएको हो ।