उपनिर्वाचन ताजा अपडेट, कसले कहाँ कहाँ जिते हेर्नुस पुरै विवरण

मंसिर १७, सोलुखुम्बु । उपनिर्वाचन भएका मध्ये ३३ स्थानको मत परिणाम सार्वजीक हुँदा नेपाली काङ्ग्रेस वडा तहमै अगाडी देखिएको छ । नेपाली कांग्रेसले अहिलेसम्म १५ वडामा जित हासिल गरेको छ भने नेकपा (एमाले) ले एक गाउँपालिका अध्यक्ष, एक गाउँपालिका उपाध्यक्षसहित ५ वटा वडामा जितेको छ । नेकपा (माओवादी केन्द्र) ले पाँच वटा वडा जित्दा जनता समाजवादी पार्टी नेपालले मधेस प्रदेशका दुई ठाउँका वडाध्यक्ष जितेको छ । राष्ट्रिय स्वतन्त्र पार्टी (रास्वपा), एकीकृत समाजवादी, नेपाल मजदुर किसान पार्टी, स्वतन्त्रले समान एक—एक स्थानमा जित हासिल गरेका छन् ।

कहाँ कहाँ जित्यो काङ्ग्रेस ले ?
नेपाली कांग्रेसले तेह्रथुमको लालीगुराँस नगरपालिका—८ मा जित हात पारेको छ । सुनसरीको गढी गाउँपालिका—६ मा नेपाली कांग्रेसका उम्मेदवार तेतर साहु, रौतहटको ईश्नाथ नगरपालिका—७ मा कांग्रेसका शेख अब्दुल खलिक, रौतहटको राजपुर नगरपालिका—६ मा कांग्रेसका समसे आलम, काठमाडौंको कीर्तिपुर नगरपालिका वडा नम्बर १ को अध्यक्षमा कांग्रेसका इच्छाकुमार महर्जन, हेटौंडा—१२ को वडाध्यक्षमा अर्जुनप्रसाद तिवारी निर्वाचित भएका छन् । गुल्मीको मुसिकोट–१ मा नेपाली कांग्रेसका आनन्द श्रेष्ठले १ हजार १ सय ८४ मत पाएर जित हासिल गरेका छन् । रोल्पाको रुन्टीगढी गाउँपालिका वडा नम्बर ४ मा कांग्रेसका भुपमणि पुन मगरले ६ सय ४३ मत ल्याएर जित हात पारे । बर्दियाको ठाकुरबाबा नगरपालिका वडा नम्बर ४ मा कांग्रेसका अमिन थारू, जाजरकोटको कुशे गाउँपालिका—७ मा कांग्रेसका खम्बबहादुर सिंह, रुकुमपश्चिमको सानीभेरी गाउँपालिका—५ मा कांग्रेसका मोतीराम खत्री, बझाङको सूर्मा गाउँपालिका—४ मा कांग्रेसका धिरेन्द्र पुजारा, डोटीको पुर्वीचौकी गाउँपालिका वडा नम्बर ६ मा नेपाली कांग्रेसका मोहन थापा, दार्चुलाको दुहु गाउँपालिका वडा नम्बर ५ मा कांग्रेसका धनसिंह कुँवर निर्वाचित भए । कञ्चनपुरको भीमदत्त नगरपालिका—६ मा कांग्रेसका प्रकाश चन्दले जितेका छन् ।

एमालेले कहाँ–कहाँ जित्यो ?
ताप्लेजुङको सिरिजंघा—३ मा एमालेका कुमारी सावादेन निर्वाचित भइन् । यता ओखलढुंगाको मोलुङ गाउँपालिका अध्यक्षमा एमालेका गंगाबहादुर तामाङ निर्वाचित भए । महोत्तरीको रामगोपालपुर नगरपालिका—२ मा एमालेका सकिवुल खाँ निर्वाचित भए । कपिलवस्तुको शुद्धोधन गाउँपालिका—१ मा एमालेका मोहमत ताहिर मुसलमानले वडाध्यक्ष जिते । दैलेखको दुल्लु नगरपालिका वडा नम्बर १३ मा एमालेका लालबहादुर शाही ले, दैलेखकै महाबु गाउँपालिका अध्यक्षमा एमालेका जंगबहादुर शाही ३ हजार १२७ मतसहित निर्वाचित भए । उनका प्रतिस्पर्धी कांग्रेसका झलकबहादुर भण्डारीले २ हजार ६७५ मत ल्याए । बाजुराको स्वामीकार्तिक खापर गाउँपालिका उपाध्यक्षमा नेकपा (एमाले) की सुलोचना भण्डारी निर्वाचित भएकी छन ्।

माओवादीले कहाँ कहाँ जित्यो ?
उदयपुरको त्रियुगा नगरपालिका वडा नम्बर १२ माओवादी केन्द्रका नवीनकुमार बान्तवा राई निर्वाचित भए । धनुषाको धनुषाधाम नगरपालिका—१ मा माअ‍ोवादी केन्द्रका सुनील कापर केवट, नुवाकोटको ककनी गाउँपालिका वडा नम्बर २ मा माओवादी केन्द्रका कृष्ण घिमिरे निर्वाचित भएका छन् । गोरखा नगरपालिका—५ माओवादी केन्द्रका विष्णुबहादुर मगर, रोल्पाको पुथा उत्तरगंगा—२ मा माओवादी केन्द्रका जगत घर्ती निर्विरोध वडाध्यक्ष चुनिएका थिए ।

जसपाले कहाँ कहाँ जित्यो ?
स्थानीय तह उपनिर्वाचनमा सप्तरी डाक्नेश्वरीका दुवै वडामा जनता समाजवादी पार्टी नेपाल निर्वाचित भएको छ । निर्वाचन आयोगले अद्यावधिक गरेको विवरणअनुसार वडा नम्बर १ को अध्यक्षमा जसपा धिरेन्द्रकुमार शाह निर्वाचित भए । डाक्नेश्वरीकै वडा नम्बर ४ मा जसपाका देवेन्द्रप्रसाद यादव निर्वाचित भए । गत स्थानीय तह निर्वाचनमा यी दुवै वडामा नेपाली कांग्रेस निर्वाचित भएको थियो ।

राष्ट्रिय स्वतन्त्र पार्टीले पनि खोल्यो खाता

काठमाडौं महानगरपालिका—१६ को वडाध्यक्ष राष्ट्रिय स्वतन्त्र पार्टी (रास्वपा)ले जितेको छ । पहिलोपटक स्थानीय तह निर्वाचनमा भाग लिएको रास्वपाले काठमाडौं महानगरपालिका—१६ मा जित हात पारेको हो । रास्वपाकी रोजिना श्रेष्ठले २ हजार ९ सय २ मत ल्याएर वडाध्यक्ष निर्वाचित भएकी छन् ।

एकीकृत समाजवादी, नेमकिपा र स्वतन्त्रले जिते एकएक ठाउँ
रौतहटको गढीमाई नगरपालिका—८ मा एकीकृत समाजवादीका बजरंगीप्रसाद यादव निर्वाचित भए । कालीकोटको तिलागुफा नगरपालिका—४ मा नेपाल मजदुर किसान पार्टीले जित हात पा¥यो । झापाको कन्काई नगरपालिका—६ मा स्वतन्त्र उम्मेदवार लक्ष्मीप्रसाद ओली ४ सय ९३ मतका साथ निर्वाचित भए ।