फर्जी कागज बनाएर चन्दा असुल्दै हिड्ने २  जना खोटाङ प्रहरीको नियन्त्रणमा  

मंसिर १७, सोलुखुम्बु ।  कान नसुन्ने लगायत विभिन्न अपाङ्गता भएको फर्जी कागज  चन्दा असुल्दै हिड्ने २ जनालाई प्रहरीले पक्राउ गरेको छ । जिल्ला प्रहरी कार्यालय खोटाङले फर्जी कागज बनाएर चन्दा असुल गर्दै हिड्ने २ जनालाई पक्राउ गरेको हो ।

खोटाङको ऐसेलुखर्क गाउँपालिका क्षेत्रमा गोरखाको सहिद लख गाउँपालिकाले लेखेको कागज बनाएर चन्दा असुल गर्दै हिँडेका २ जनालाई प्रहरीले फेला पारि पक्राउ गरेको जनाएको छ । कान नसुन्ने, आँखा नदेख्ने, पारिवारिक स्थिति ज्यादै खराव भएको भनी  फर्जी कागजमा नाम समेत झुटो बनाई चन्दा असुली गर्दै हिँडेका बाराको जितपुर सिमरा उपमहानगर पालिकाका १९ वर्षीय द्वय अजय राम चमार र जितेन्दर राम चमारलाई खोटाङ प्रहरीले पक्राउ गरेको हो ।  

उनीहरूले सहिद लखन गाउँपालिका गोरखाको लेटर प्याडमा सन्तोष कुमार शर्मा र दिपेन्द्र कुमार शर्मा नाम राखेर ठाउँठाउँमा चन्दा माग्दै हिँडेको पाइएको छ । उनीहरूको साथबाट प्रहरीले ठुलो मात्रामा रकम बरामद गरेको जिल्ला प्रहरी कार्यालय खोटाङका सूचना अधिकारी मोहन पोखरेलले बताउनुभयो ।  उनीहरूलाई पक्राउ गरि जिल्ला अदालत खोटाङबाट चन्दा ऐन सम्बन्धी कसुरमा ३ दिनको म्याद थप गरि अनुसन्धान सुरु गरिएको सूचना अधिकारी पोखरेलले बताउनुभयो ।