ऐसेलुखर्कमा विभिन्न कार्यक्रम गरी ३३ औँ अन्तराष्ट्रिय अपाङ्गता दिवस मनाइयो

मंसिर १८, सोलुखुम्बु । खोटाङको ऐसेलुखर्क गाउँपालिमा मंगलबार ३३ औँ अन्तर्राष्ट्रिय अपाङ्गता दिवस विभिन्न कार्यक्रम गरी मनाइएको छ । ‘समावेशी तथा दिगो भविष्यको पूर्वधार अपांगता भएका व्यक्तिहरुको प्रवल नेतृत्व यसको आधार’ मूल नारासहित यस वर्षको अपाङ्गता दिवस मनाइएको हो ।

संयुक्त राष्ट्र सङ्घले सन् १९८१ लाई अपाङ्ग वर्ष घोषणा गरी विश्वव्यापी रूपमा मनाउन आह्वान गरेपछि वर्षेनि डिसेम्बर ३ मा संसारभर विश्व अपाङ्गता दिवस मनाउन सुरु गरिएको हो । ऐसेलुर्खक गाउँपालिकाका उपाध्यक्ष राजेश कुमार राजभण्डारीको प्रमुख आतिथ्यतामा लौंगिक हिंसा विरुद्धको १६ दिने अभियान अन्तर्गत दिवस मनाईएको करुणा फाउण्डेशन नेपाल ऐसेलुखर्कका प्रतिनिधी ईश्वर भट्टराईले जानकरी दिनुभयो ।

विभिन्न प्लेकार्ड एवंम नारासहित ३ नम्बर वडा कार्यालयबाट पालिका कार्यालयमा पुगी कोण सभामा परिरत भएको थियो । कार्यक्रममा अपाङ्गता भएका व्यक्तिहरुको संस्थाका सचिव लक्ष्मण श्रेष्ठले आफनो संस्थाको हक अधिकारको बारे जानकारी गराउनुभएको थियो । दिवसको अवसरमा गाउँपालिकाका उपाध्यक्ष राजभण्डारीले अपाङगता भएका व्यक्तिहरुको जिवनयापनका लागि पालिकाबाट सकिने सक्दो सहयोग गर्ने प्रतिबद्धता व्यक्त गर्नुभएको छ ।

कार्यक्रममा अपाङ्गता भएका ब्यक्तिलाई सहायक सामग्री वितरण गरिएको जनाइएको छ । उक्त कार्यक्रममा गाउँपालिकाका प्रमुख प्रशासकिय अधिकृत रेख बहादुर थापा, प्रहरी चौकी ऐसेलुखर्कका प्रहरी निरीक्षक उद्धवप्रसाद जम्बर कट्टेल, जनस्वास्थ्य निरीक्षक रामकाजि नेपाल, स्वास्थ्य शाखा संयोजक सचिन श्रेष्ठ, महिला शाखा प्रमुख चन्द्रकला राई लगायत विभिन्न प्रतिनिधिहरुको उपस्थिती रहेको थियो ।