सोलुखुम्बुका जनतालाई चिसोबाट जोगाउन दाउराको व्यवस्था गरिने 

मंसिर १८, सोलुखुम्बु ।  आसन्न चिसो मौसमलाई  मद्देनजर गर्दै हिमाली जिल्ला सोलुखुम्बुका नागरिकलाई दाउराको व्यवस्थापन गरिने भएको छ ।  जिल्ला विपद व्यवस्थापन समिति सोलुखुम्बुको बैठकमा आसन्न चिसो मौसमलाई ध्यानमा राख्दै चिसो मौसममा न्यानो राख्नका लागी ठाउँ ठाउँमा दाउराको व्यवस्था गर्न डिभिजन वन कार्यालयसँग अनुरोध गरिएको छ ।  जिल्ला विपद व्यवस्थापन समिति सोलुखुम्बुका अध्यक्ष एवं प्रमुख जिल्ला अधिकारी अनोज कुमार घिमिरेको अध्यक्षतामा बसेको बैठकले हिमाली जिल्ला सोलुखुम्बुमा चिसोजन्य विपद पूर्व तयारीका लागी दाउरा व्यवस्थापनलाई अगाडि सारेको हो ।

 यस्तै बैठकमा हिमपात भइहालेको अवस्थामा सडक बन्द हुने समस्यालाई ध्यानमा राख्दै हिउँ हटाउनलाई जेसीवि तयारी अवस्थामा राख्ने पनि निर्णय गरेको छ ।  सडक डिभिजन कार्यालय हर्कपुरसँगको समन्वयमा हिमपात हुनसक्ने सम्भावित स्थानहरू जस्तै पत्ताले क्षेत्रमा सडकको हिउँ हटाउन जेसीवि तयारी अवस्थामा राख्न सडक डिभिजन कार्यालयसँग समन्वय गर्ने निर्णय गरेको हो । बैठकमा उपस्थित जिल्लाका राजनीतिक दल एवं सामाजिक सङ्घसंस्था लगायत अन्य सरोकारवालाले विपद सँग सम्बन्धित विषयमा विभिन्न जिज्ञासा र सुझाव राखेका थिए । उक्त बैठकमा जिल्ला प्रहरी कार्यालय साेलुखुम्बुका प्रमुख द्वारीका प्रसाद घिमिरेले जिल्लामा विपदकाे समयमा प्रहरीले गरेका कामसँगै चिसाेजन्य विपदमा बच्ने उपायहरूकाे बारेमा प्रस्तुतीकरणा दिनुभएकाे थियाे ।  

 यस्तै नेकपा माओवादी केन्द्र सोलुखुम्बुका संयोजक नाम्गेल शेर्पाले विपद भन्ने बित्तिकै जुनसुकै रुपमा पनि आउन सक्ने र घटना घट्न सक्ने भएकाले त्यसतर्फ सबै पक्ष सचेत हुनपर्ने बताउनुभयो ।  उहाँले जिल्लामा विपदबाट प्रभाबितहरुको बारेमा चासो राख्दै विभिन्न समस्याका विषयमा सीडीयो घिमिरे लगायत अन्य सरोकारवालाहरूको ध्यानाकर्षण गराउनुभयो ।  बैठकमा प्रमुख जिल्ला अधिकारी घिमिरेले उठेका समस्याहरुमा आफूले सक्ने समाधानका प्रयास गर्ने प्रतिबद्धता व्यक्त गर्नुभएको छ ।

 बैठकमा जिल्लाका पालिकाहरूका उपाध्यक्ष एवं प्रतिनिधीहरु, स्थित सरकारी कार्यालयका प्रमुख एवं प्रतिनिधी, राजनैतिक दलका प्रमुख तथा प्रतिनिधि लगायतको उपस्थिति रहेको थियो ।