उद्यमी बन्न चाहने युवालाई माप्य दुधकोशी १ मा विल्डिङ ईलेक्ट्रीसियन सम्बन्धी तालिम

मंसिर २१, सोलुखुम्बु । सोलुखुम्बुको माप्य दुधकोशी गाउँपालिका वडा नम्बर १ मा उद्यमी बन्न चाहने युवाहरुलाई विल्डिङ ईलेक्ट्रीसियन सम्बन्धी तालिम सुरु गरिएको छ । शुक्रबारबाट घरेलु तथा साना उद्योग कार्यालय सोलुखुम्बुको आयोजना तथा वडा कार्यालयको सहकार्यमा ९० घण्टे विल्डिङ ईलेक्ट्रीसियन सम्बन्धी सिप विकास तालिम सुरु गरिएको हो ।

स्थानीयस्तरमा बेरोजगार युवालाई उद्यमशिल बनाउने उदेश्यका साथ वडा अध्यक्ष सज्जन राईको अध्यक्षता र घरेलु तथा साना उद्योग कार्यालय सोलुखुम्बुको प्रमुख नारायण प्रसाद खतिवडाको आतिथ्यतामा तालिमको उद्घाटन गरिएको कार्यक्रम संयोजक टेक बहादुर बस्नेतले जानकारी दिनुभयो ।

तालिमको उद्घाटन कार्यक्रममा बोल्दै वडा अध्यक्ष राईले तालिम गराउनुको उदेश्य तालिमबाट केही कुरा सिकेर उद्यमशील बनी राम्रो आमदामी गरेर जीवन परिर्वतन गर्नुपर्ने बताउनुभयो । यस्तै घरेलु तथा साना उद्योग कार्यालय सोलुखुम्बुको प्रमुख नारायण प्रसाद खतिवडाले सरकारले गरेको लगानी र सिकेको सिपलाई सदुपयोग गर्दे उद्यमी बन्न आग्रह समेत गर्नुभएको छ ।

हाल प्रदान गरिएको तालिम बेसिक भएकाले संक्रिय भएमा थप तालिमका लागि पहल गरिने प्रतिबद्धता व्यक्त गर्नुभएको छ । तालिम आजबाट सुरु भइ आगामी पौष ५ सम्म संचालन हुने भएको छ । १५ जना सहभागी तालिमको सहजिकरण इन्द्र कुमार राजभण्डरीले गरिरहनुभएको जनाइएको छ ।