ओखलढुंगामा हाडनाता करणी मुद्दामा फरार प्रतिवादी पक्राउ

मंसिर २१, सोलुखुम्बु । जिल्ला अदालत ओखलढुंगाले हाडनातामा जबरजस्ती करणी मुद्दामा कैदको फैसला भएका फरार प्रतिवादीलाई प्रहरीले पक्राउ गरेको छ । २०८० चैत २५ गतेको फैसलाले कैद सजाय सुनाएका जिल्लाका ५३ वर्षिय पुरुषलाई प्रहरीले पक्राउ गरिएको हो ।

जबरजस्ती तथा हाडनाता करणी मुद्दामा जिल्ला अदालतले १० बर्ष १ महिना २२ दिन कैद सजाय र ३ लाख ३० हजार जरिवाना तोकिएका प्रतिवादी फरार रहेकोमा प्रहरीले बुधबार मोलुङ गाउँपालिका ६ श्रिचौरबाट प्रहरी टोलीले पक्राउ गरेको जिल्ला प्रहारी कार्यालय ओखलढुंगाका सुचना अधिकारी विजय कार्कीले जानकारी दिनुभयो ।

फैसला कार्यन्वयनलाई थप प्रभावकारी बनाउन श्रीचौर ओखलढुंगाबाट खटिएको प्रहरी टोलीले फरार प्रतिवादी खोज तलास गर्ने क्रममा चेप्टे भन्ने स्थानमा फेला पारी ल्याईएको सुचना अधिकारी कार्कीले बताउनुभयो ।

पक्राउ प्रतिवादीलाई ओखलढुंगा जिल्ला अदालतमा पेश गरि कैद भुक्तान तथा जरिवाना समेत असुल उपरको लागि जिल्ला कारागार ओखलढुंगामा पठाईएको जिल्ला प्रहरी कार्यालय ओखलढुंगाले जनाएको छ । यस्तै निज समेत गरी विभिन्न कसुरमा फरार रहेका ६ जना प्रतिवादीलाई समेत पक्राउ गरि पेश गरिएको प्रहरीले जनाएको छ ।