पौष ४, सोलुखुम्बु । सोलुखुम्बुको महाकुलुङ गाउँपालिका वडा नम्बर २ का एकल तथा विधवा महिलाहरुलाई लुम्बिनी भ्रमणमा लगिने भएको छ । वडा कार्यालयको आर्थिक बर्ष २०८१/०८२ को एकल तथा विधवा महिला लुम्बिनी भ्रमण कार्यक्रम अन्तरगत ७ लाख विनियोजित बजेट मार्फत ५० जना महिलालाई ५ दिने भ्रमणमा लगिने भएको हो ।
भगवान गौतम बुद्धको पवित्र जन्मस्थल लुम्बिनीमा लैजादा महिलाहरुले पर्यटकीय क्षेत्रको ऐतिहासिक र वर्तमान अवस्था थाहा पाउने उदेश्य रहेको वडा अध्यक्ष प्रदिप राईको भनाई छ । एकल तथा विधुवा महिलाको आफ्नो पीर मर्का समाधानका लागि लुम्बिनी भ्रमणले मन शान्त हुनका साथै अवलोकन भ्रमणले सकारात्मक सन्देश जाने विश्वास व्यक्त गर्नुभयो ।
वडा कार्यालयले विगतका बर्षहरुमा जेष्ठ नागरिकहरुलाई विभिन्न धार्मिक तथा पर्यटकीय क्षेत्र भ्रमणमा लगिएको स्मरण गर्दै यस बर्ष विधवा तथा एकल महिलालाई प्राथमिकता दिएको वडा अध्यक्ष राईको भनाई छ ।
यही पौष १४ गते देखि १९ गते सम्म आयोजना गरिएको भ्रमणमा ५० जना महिला सहित वडा अध्यक्ष राई, वडा दलित महिला सदस्य चस्मिता विश्वकर्मा, महिला सदस्य निरकुमारी कुलुङ, वडा सदस्यद्धय ज्ञान बहादुर राई र लक्ष्मण कुलुङ लगायत स्वास्थ्यकर्मी र गाइडको समेत सहभागीता रहने भएको छ ।
Discussion about this post