सोलुका २ पालिकाको सहकार्य, ओर्लाङघाटमा ह्‍युमपाइप राख्न सोलुदुधकुण्ड र माप्यबीच सहमति 

पौष ४, सोलुखुम्बु ।  सोलुखुम्बुको माप्य दुधकोशी र खुम्बु पासाङल्हामु गाउँपालिका जोड्ने ओर्लाङबाटमा ह्युमपाइप राखेर सडक सुचारु गराउन २ पालिका बीच सहमति भएको छ ।  सोलुखुम्बुको एकमात्र नगरपालिका सोलुदुधकुण्ड नगरपालिका १ र माप्य दुधकोशी गाउँपालिका १ को बीचमा ओर्लाङघाटमा ह्‍युमपाइप राख्न बुधबार सहमति भएको हो  ।

सोलुदुधकुण्ड नगरपालिकाका मेयर नाम्गेल जाङ्बु शेर्पा र माप्य दुधकोशी गाउँपालिकाका उपाध्यक्ष गौरव राई बीच उक्त स्थानमा ह्‍युमपाइप राखेर माप्य, खुम्बु सडक सञ्चालनका लागी औपचारिक सहमत भएको बताइएको छ ।  बाढी पहिरो र अन्य विभिन्न कारणले क्षतिग्रस्त बनेको सडक ट्रयाक सुचारु गरि खुम्बु क्षेत्रमा सडक आवतजावत खुलाउनका लागी ह्‍युमपाइप राख्ने, सडक खुलाउने लगायत कार्यमा २ पालिका बीच भएको सहमतिले २ पालिका बीचको सहकार्यलाई उजागर गरेको माप्य दुधकोशी गाउँपालिकाका कार्यपालिका सदस्य आङ काजी शेर्पाले बताउनुभयो ।

माप्य दुधकोशी गाउँपालिकाका उपाध्यक्ष गौरव राईले हाललाई अस्थाई रुपमा ह्‍युमपाइप बाट सडक सुचारु गरिने सुचारु गरिने र चाँडै पुल राख्नेगरि ठेक्का हुन पनि बताउनुभएको छ । जनताको नजिकको भनिएका सरकार बीचमै मेल नहुँदा रहने अधुरा र अलपत्र कामहरूलाई यि सरकार बीचको सहकार्यले समयमै सम्पन्न गरि नागरिकलाई सरकार भएको अनुभूति दिलाउन यो सहमति भएको पालिकाहरूले जनाएका छन् ।  

हिउँदमा खोलामा पानीको बहाव कम हुँदा ह्युमपाईप माथीबाट सवारी साधन सञ्चालन गर्न सकिने र जेठ लागेपछि उक्त ह्युमपाइप निकालेर विकल्प खोजिने सोलुदुधकुण्ड नगरपालिकाका मेयर शेर्पाले बताउनुभयो ।  उहाँले केही समयभित्र ह्‍युमपाइप राख्ने काम सम्पन्न हुने र कोशीपारीका जनतालाई राहत हुने बताउनुभयो ।