रेडियो एभरेष्टले शुरु गर्यो पालिका बहस, जनप्रतिनिधिलाई उत्तरदायी बनाउने लक्ष्य

९ पौष, सोलुखुम्बु । रेडियो एभरेष्टले जनताका कुरा जनप्रतिनिधिसमक्ष पुर्याउने लक्ष्य सहित पालिका बहस कार्यक्रम शुरु गरेको छ । जनप्रतिनिधिलाई नागरिकप्रति उत्तरदायी बनाउने लक्ष्य सहित शुरु गरिएको पालिका बहस कार्यक्रमको पहिलो शृङ्खला सोलुदुधकुण्ड नगरपालिका वडा नम्बर ११ तिङ्लामा रेकर्ड गरिएको छ ।

अडियो र भिडियो दुवै माध्यममा स्थलगत रुपमा रेकर्ड गरिने कार्यक्रममा सहभागीहरू जनताहरूले जनप्रतिनिधिसँग सिधै प्रश्न, गुनासो र सुझावहरू राख्न पाउने छन् । सुशासन प्रबर्द्धन र नागरिक खबरदारी भन्ने मूल नारा सहित शुरु भएको कार्यक्रम हरेक स्थानमा सञ्चालन गरिने रेडियो एभरेष्टका प्रबन्ध निर्देशक भानुभक्त निरौलाले बताउनु भयो ।

तिङ्लामा मङ्गलबार आयोजित कार्यक्रममा नागरिकहरूले राखेका प्रश्नहरूको जवाफ वडा अध्यक्ष टङ्क कार्कीले दिनुभएको छ । वडा कार्यालयको प्राङ्गणमा रेकर्ड गरिएको कार्यक्रम रेडियो एभरेष्टबाट सुन्न तथा रेडियो एभरेष्टको अफिसियल फेसबुक पेज र युट्युबबाट हेर्न सकिने छ ।