मुन्दुम पदमार्गको विकासका लागि तीन जिल्लाका पालिका जुट्दै

पौष १०, सोलुखुम्बु । सरकारको घुम्नै पर्ने सय पर्यटकीय गन्तव्यभित्र पर्न सफल मुन्दुम पदमार्गको विकास गर्न सोलुखुम्बु सहित तीन वटा जिल्लाका पालिका जुटेका छन् । ‘मुन्दुम भ्रमण वर्ष सन् २०२५’ घोषणा गरेर भोजपुर, खोटाङ र सोलुखुम्बुका पालिका यो पदमार्गको विकास तथा विस्तारमा जुटेका हुन् ।

भ्रमण वर्षमा पदमार्गमा आन्तरिक र बाह्य गरी एक लाख जना पर्यटक भित्र्याउने लक्ष्य छ । पूर्वी क्षेत्रको एकमात्र सहज र सरल पदमार्गका रूपमा लिइने मुन्दुम पदमार्गको विकासमा तीन वटा जिल्लाका पालिका एकजुट बनेर अघि बढेको भोजपुरको टेम्केमैयुङ गाउँपालिकाका अध्यक्ष सरोज बस्नेतले बताउनुभयो ।

भ्रमण वर्षलाई लक्षित गरेर पर्यटन प्रवर्द्धनका लागि मुन्दुम पदमार्गमा पर्ने टेम्केमैयुङ–४ नागीमा आउँदो माघ १ देखि ५ गतेसम्म ‘सांस्कृतिक, पर्यटन तथा कृषि मेला को आयोजना गरिएको अध्यक्ष बस्नेतले जानकारी दिनुभयो । यो कार्यक्रममार्फत मुन्दुम पदमार्गको प्रवद्र्धन र दिगो विकासका लागि यस क्षेत्रमा पर्ने पालिकाको साझा अवधारणापत्र सार्वजनिकसँगै संयुक्तरूपमा हस्ताक्षर गरिने उहाँको भनाइ छ । मेलामा पर्यटकलाई लक्षित गरेर स्थानीय उत्पादनको प्रदर्शनी पनि गरिनेछ ।

मुन्दुम पदमार्गको बृहत्तर विकासका लागि भोजपुरको टेम्केमैयुङ गाउँपालिका, भोजपुर नगरपालिका, षडानन्द नगरपालिका, साल्पासिलिछो गाउँपालिका, रामप्रसादराई गाउँपालिका, आमचोक गाउँपालिका, खोटाङको केपिलाशगढी गाउँपालिका, साकेला गाउँपालिका, दिक्तेल रुपाकोट मझुवागढी नगरपालिका र सोलुखुम्बुको महाकुलुङ गाउँपालिका संयुक्तरूपमा जुटेका हुन् ।