कारागारका कैदीको सोलु प्रशासनले ग¥यो स्वास्थ्य जाँच 

पौष १३, सोलुखुम्बु ।  जिल्ला प्रशासन कार्यालय सोलुखुम्बुले कारागारमा रहेका कैदीबन्दीको स्वास्थ्य परिक्षण गरेको छ ।  कारागारमा कैद भुक्तान गरिरहेका १ सय ५ कैदीहरू मध्ये शनिबार ६४ जना कैदीहरूको स्वास्थ्य परिक्षण गरिएको हो ।

 कैदीहरूको संविधानप्रदत्त अधिकार सुनिश्चित गर्दै कैदीहरूको स्वास्थ्य अवस्था बुझ्नका लागी उनीहरूको स्वास्थ्य परिक्षण गरिएको प्रमुख जिल्ला अधिकारी अनोज कुमार घिमिरेले बताउनुभयो ।  जिल्ला अस्पताल फाप्लु र जिल्ला सामुदायिक आँखा केन्द्र फाप्लुको सहकार्यमा कारागारमा रहेका ५४ पुरुष र १० महिला गरि ६४ जनाको स्वास्थ्य परिक्षण गरिएको प्रजिअ घिमिरेले बताउनुभयो ।

जिल्ला अस्पतालका डाक्टर प्रशान्त शाह, जिल्ला सामुदायिक आँखा केन्द्र फाप्लुका प्रमुख विधान ताम्राकार, दन्त चिकित्सक अनिल कुमार कार्की लगायतको टोलीले कारागारमै पुगेर कैदीहरुको रगतमा सुगरको जाँच, आँखाको जाँच, रोगका लक्षणहरूको उपचार, मुख स्वास्थ्यको अवस्था लगायतको परिक्षण गरि उपचारका लागी सल्लाह प्रदान गरिएको डाक्टर प्रशान्त शाहले बताउनुभयो ।