खाेटाङ्ग राखाका भानुभक्तलाई घरमै दिइयो नागरिकता 

पौष १५, खोटाङ्ग । खोटाङको ऐसेलुखर्क गाउँपालिका वडा नम्बर १ राखाबाङ्देलका एक अपाङ्गता भएका व्यक्तिलाई घरमै पुगेर नागरिकता वितरण गरिएको छ । राखाबाङ्देलका २१ वर्षीय भानुभक्त राईलाई गाउँपालिका अध्यक्ष गिरेन्द्र बाहदुर राई सहितको टिम पुगेर घरमै नागरिकता वितरण गरिएको हो । ७ वर्षको उमेर देखी अपाङ्गताको शिकार बनेका राईलाई गाउँपालिका अध्यक्ष राई, उपाध्यक्ष गिरेन्द्र बाहदुर राई, वडा नम्बर १ का अध्यक्ष पुरुषोत्तम राजभण्डारी, इलाका प्रशासन कार्यालयका प्रमुख लगायतको टिमले राईलाई नागरिकता वितरण गर्नुभएको हो ।

 नागरिकता वितरण गर्दै अध्यक्ष राईले आवश्यक सहयोग गर्ने बताउनुभएको छ ।  उहाँले गाउँपालिकामा निर्वाचित भएर आइसकेपछि हरदम नागरिकको सेवामै समर्पित भएर काम गरिरहेको बताउनुभयो । यस्तै राईकाे नागरिकता वितरण गदै उपाध्यक्ष राजभण्डारीले गाउँपालिकाभित्रका फरक क्षमताका व्यक्तिहरूलाई करुणा फाउण्डेसन जस्ता संस्थाहरुको सहयोगमा काम गरिरहेको बताउनुभयो  । उहाँले हाल सम्म १० जना बढी अपाङ्गता भएका व्यक्तिहरूको घरमै पुगेर नागरिकता वितरण गरिएको उल्लेख गर्नुभयो ।  यस्तै वडा अध्यक्ष राजभण्डारीले वडामा २० औँ जना अपाङ्गता भएका र फरक क्षमताका मानिसहरू भएको उल्लेख गर्दै उनीहरूको सहज जीवनयापनका लागी विभिन्न सहयोग गरिरहेको बताउनुभयो ।  

नागरिकता प्राप्त गर्दै राईले नागरिकता नहुँदा आइपरेका विभिन्न समस्या अव समाधान हुने बताएका छन् । उनले नागरिकता पाएपछि आफूलाई खुसी लागेको प्रतिकृया दिएका छन् ।  भानुभक्तलाई उनका दाजुभाइ, आमा र फुपूले स्याहार गर्दै आएका छन् ।