रेडियो एभरेष्ट जनताको घरमा, सुदूर राखाबाङ्देलमा गरियो वडा बहस 

पौष १५, खोटाङ ।  रेडियो एभरेष्टले सुरु गरेको पालिका बहसको दोश्रो अङ्क खोटाङमा सम्पन्न भएको छ ।  खोटाङको ऐसेलुखर्क गाउँपालिका वडा नम्बर १ राखाबाङ्देलमा पालिका बहस सम्पन्न गरिएको हो । जनता र सरकारबीचको खाडल पुर्दै जनताका समस्या सुन्ने हेतुले सुरु भएको पालिका बहस गाउँपालिकाको वडा नम्बर १ राखाबाङदेलमा वडा अध्यक्ष पुरुषोत्तम राजभण्डारी र रेडियो एभरेष्टका दिपेन्द्र खनालबीच बहस सम्पन्न भएको हो ।

 कार्यलयको प्राङ्गणमा सम्पन्न बहसमा वडाका करिव ४५ जना जनताहरूको उल्लेख्य सहभागितामा कार्यक्रम सम्पन्न भएको छ ।  कार्यक्रममा सहभागीहरूले वडाको विकास निर्माण, रोजगारी, शिक्षा र स्वास्थ्य लगायतको विषयमा सहभागीहरूले चासो र प्रश्न राखेका थिए भने उक्त प्रश्नहरूको उत्तर अध्यक्ष राजभण्डारीले दिनुभएको थियो ।  बहसका क्रममा सहभागीहरूले गाउँमा सडकको अवस्था कमजोर भएको, पुल नबनेको, शिक्षाको गुणस्तर खस्कँदै गएको, खानेपानीको अभाव भएको, विकास निर्माणमा ढिलासुस्ती भएको विषयमा प्रश्न राखेका थिए ।

उनीहरूको प्रश्नमा अध्यक्ष राजभण्डारीले विद्यमान समस्याहरूको समाधान गर्न वडा सरकार लागी परिरहेको भएपनि बजेट र पहुँचको हिसाबले कम भएको भन्दै राखाबाङ्देल ऐसेलुखर्कको कर्णाली जत्तिकै दुर्गम भएकाले समस्या भएको उल्लेख गर्नुभयो ।