तिङ्लामा सकियो एक महिने एड्भान्स मखमल तथा ढाकाको जुत्ता, चुप्पल बनाउने तालिम

पौष १५, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्लामा मखमल ढाका जुता चप्पल बनाउने तालिम सम्पन्न भएको छ । घरेलु तथा साना उद्योग कार्यालयको आयोजना तथा सोलुदुधकुण्ड नगरपालिका ११ को समन्वयमा सञ्चालन गरिएको एक महिने एड्भान्स मखमल तथा ढाकाको जुत्ता, चुप्पल बनाउने तालिम सोमबार सम्पन्न भएको हो । अपांगता भएका व्यक्तिहरुलाई लक्षित गरी तालिम दिइएको वडा अध्यक्ष टंक बहादुर कार्कीले जानकारी दिनुभयो ।

समापन कार्यक्रममा बोल्दै अध्यक्ष कार्कीले अपाङ्गता भएकाहरूको पुनस्र्थापनाका लागि यस खाले कार्यक्रमलाई वडाले प्राथमिकता दिदै जाने बताउनुभयो । उहाँले सरकारले गरेको लगानी र सिकेको सिपलाई सदुपयोग गर्दे उद्यमी बन्न आग्रह समेत गर्नुभएको छ । यस्तै घरेलु तथा साना उद्योग कार्यालय सोलुखुम्बुका प्रमुख नारायण प्रसाद खतिवडाले तालिमलाई भरपुर सदुपयोग गर्दै उद्यमी बनी जिल्लालाई जुत्ता चप्पलमा आत्मनिर्भर बनाउने तर्फ लाग्नुपर्नेमा जोड दिनुभयो ।

उक्त तालिम समापन कार्यक्रममा सोलुदुधकुण्ड नगरपालिकाकी उपमेयर गान्धि माया तामाङ, महिला सदस्य लगायतको उपस्थित रहेको थियो । उक्त तालिममा वडा भित्रका १२ जनाको सहभागीता रहेको कार्यक्रम संयोजक टेक बहादुर बस्नेतले बताउनुभयो ।