तोरी फलाउने केपिलासगढीका ५३५ किसानलाई अनुदान

पौष १६, सोलुखुम्बु । खोटाङको केपिलासगढी गाउँपालिकामा तोरी फलाउने कृषकहरुले अनुदान पाएका छन् । किसानहरुले उत्पादन गरेको तोरीको प्रतिपाथी २५० रुपैयाँका दरले अनुदान रकम पाएका हुन् । आर्थिक वर्ष २०८०/०८१ को स्वीकृत नीति तथा कार्यक्रम अन्तर्गत तोरी खेती प्रोत्साहन अनुदानमा ११ लाख १७ हजार ३ सय ५० रुपौयाँ रकम अनुदान पाएका छन् ।

गाउँपालिका कृषि शाखाका कृषि सहायक प्राविधिक कृष्ण बस्नेतका अनुसार फेदीका १४७ जना कृषकले ३ लाख ७० हजार २ सय रुपैयाँ, खार्तम्छाका ७२ जना कृषकले २ लाख १० हजार ७ सय ५० रुपैयाँ र बासपानीका ११० जना कृषकले दुई लाख ४ हजार ७ सय ५० रुपैयाँ अनुदान रकम पाएका छन् ।

यस्तै बाक्सिलाका ५९ जना कृषकले १ लाख ५० हजार रुपैयाँ, सप्तेश्वरका ४२ जना कृषकले ९१ हजार ५० रुपैयाँ, दिप्सुङका २५ जना कृषकले ५८ हजार ५सय रुपैयाँ र सुङदेलका १४ जना कृषकले ३२ हजार १ सय रुपैयाँ अनुदान पाएका हुन् । कृषि प्राविधिक र वडाका जनप्रतिनिधि घरघर पुगेर उत्पादित तोरीको मापन(तौलिएर) पाथी छुट्याएपछि उत्पादन वापतको अनुदान रकम वाँडिएको गाउँपालिका अध्यक्ष समिर राईले जानकारी दिनुभयो ।

गाउँपालिकालाई तेलमा आत्मनिर्भर बनाउन तथा तोरी उत्पादनमा किसानलाई प्रोत्साहन गर्ने लक्ष्यले अनुदान रकम वितरण गरिएको उहाँको भनाई छ । तोरी खेतीको क्षेत्र विस्तार गरी वातावरण सन्तुलन कायम गर्ने, गाउँपालिकाका कृषकको पहिचान गर्ने, कृषि कार्यक्रम तर्जुमामा सहजता ल्याउने, युवाहरुलाई कृषि क्षेत्रमा आवद्ध गराई स्थानीय रोजगारीको सिर्जना गर्न लगाउने उदेश्य रहेको गाउँपालिकाले जनाएको छ । यस आर्थिक बर्ष २०८१/०८२ का लागि ४८१ जना कृषकहरू सूचीकृत भएको र प्राविधिकहरुले स्थलगत अनुगमन गरिरहेको कृषि शाखाले जनाएको छ ।