ओखलढुगांमा कांग्रेसको १०० दिने विशेष अभियान सम्पन्न

पौष १७, सोलुखुम्बु । नेपाली कांग्रेस ओखलढुगांको १०० दिने विशेष अभियान समापन भएको छ । ४९ औ राष्ट्रिय एकता तथा मेलमिलाप दिवसको अवसर पारेर मंगलबार उक्त अभियानको समापन गरिएको हो । जन निर्वाचित सरकारलाई ०१७ सालमा राजा महेन्द्रले अपध्वस्त गरि पञ्चायती व्यवस्था लादेको बिरोधमा भारतमा बसेर आन्दोलन गर्दै आएका कांग्रेस नेताले मेलमिलापको नीति अवलम्बन गरि २०३३ साल पुस १६ गते स्वदेशमै प्रजातान्त्रिक आन्दोलन गर्ने गरि बी.पी. कोइराला नेपाल फर्केका थिए ।

त्यसै बर्षदेखि नेपाली कांग्रेसले पुस १६ गतेलाई मेलमलाप दिवसका रूपमा मनाउँदै आएको छ । जिल्लामा नेपाली कांग्रेसका केन्द्रीय प्रतिनिधी सूचना तथा सञ्चार विभाग प्रमुख मिनबहादुर विश्वकर्माको प्रमुख आतिथ्यतामा सञ्चालित अभियान गाउँदेखि जिल्लासम्म कांग्रेसको सङ्गठन सुधारका लागि जोड दिइएको नेपाली कांग्रेस जिल्ला कार्य समिति सहसचिव भोजकुमार श्रेष्ठले बताउनुभयो । आठ वटै स्थानीय तह र ७५ वडा तहसम्म अभियान सञ्चालन गरिएको श्रेष्ठको भनाइ छ ।

अभियानका क्रममा आठ स्थानिय तहका कांग्रेसमा आबद्ध नेता कार्यकर्ताहरूलाई केन्द्रीय प्रतिनिधी विश्वकर्मा मार्फत प्रशिक्षण दिइएको सहसचिव श्रेष्ठले बताउनुभयो । यसका साथै पालिका साथै वडा तहमा रहेका समितिहरूको नियमित बैठक बसे नबसेको, वडा, पालिका र जिल्लाबिच समन्वय भए नभएको, क्रियाशील सदस्ता वितरण तथा नवीकरण भए नभएको अनुगमन गरिएको श्रेष्ठले जानकरी दिनुभयो । पार्टीको सुदृढीकरण र मजबुत बनाउन लाग्न नेपाली कांग्रेसका केन्द्रीय प्रतिनिधी सूचना तथा सञ्चार विभाग प्रमुख विश्वकर्माले सुझाव दिनुभएको थियो ।