उदयपुरमा आयोजित फोलिक एसिड खुवाउने जनचेतनामूक भिडियो प्रतिष्पर्धामा त्रियुगा र उयपुरगढी प्रथम

पौष १७, सोलुखुम्बु । स्वास्थ्य कार्यालय उदयपुरले आयोजना गरेको फोलिक एसिडको महत्वबारे जनचेतना मूलक भिडियो निर्माण प्रतिष्पर्धामा नगरपालिका तर्फ त्रियुगा नगरपालिका र गाउँपालिका तर्फ उदयपुरगढी गाउँपालिका उदयपुर प्रथम भएको छ ।

कार्यालयले आयोजना गरेको अपाङ्गता रोकथामका लागी सन्तानको योजना बनाइरहेका दम्पती तथा गर्भवती महिलाहरुले सेवन गर्नुपर्ने फोलिक एसिड चक्कीको महत्वबारे समुदायमा जनचेतना फैलाउने उद्देश्यले आयोजना गरिएको भिडियो प्रतिष्पर्धामा त्रियुगा नगरपालिकाको आधारभूत स्वास्थ्य केन्द्र बगाहा र उदयपुरगढीको स्वास्थ्य चौकी भलायडाँडा प्रथम भएका हुन् । प्रतियोगितामा सहभागी आठ स्थानीय तहका स्वास्थ्य संस्थामध्ये नगरपालिका तर्फ चौदण्डीगढी नगरपालिकास्थित आधारभूत स्वास्थ्य केन्द्र शिवानी र गाउँपालिका तर्फ लिम्चुङबुङ गाउँपालिका स्थित स्वास्थ्य चौकी ताम्लिछा दोश्रो भएका छन् । यस्तै कटारी नगरपालिका स्थित स्वास्थ्य चौकी शदेनी र रौतामाई गाउँपालिका स्थित स्वास्थ्य चौकी मुर्कुची तेश्रो भएको स्वास्थ्य कार्यालय उदयपुरले जनाएको छ ।

स्थानीय तह, करुणा फाउण्डेसन र कोशी प्रदेश सरकारको त्रिपक्षीय साझेदारीमा सञ्चालित अपाङ्गता रोकथाम तथा पुनर्स्थापना कार्यक्रम अन्तर्गत अपाङ्गता रोकथाम गर्नका गर्भवती महिलाहरूलाई फोलिक एसिड प्रयोग गर्न जनचेतना जगाउनका लागी भिडियो प्रतिष्पर्धाको आयोजना गरिएको करुणा फाउण्डेसनका कार्यक्रम संयोजक संयोग खतिवडाले बताउनुभयो । उहाँका अनुसार यस कार्यक्रममा ओखलढुङ्गा, सोलुखुम्बु, खोटाङ र उदयपुरका ३४ स्थानीय तहका स्वास्थ्य संस्थाहरू सहभागी भएका थिए । सहभागी मध्ये प्रथम द्वितीय र तृतीय हुने स्वास्थ्य संस्थाहरूले पुरस्कार राशि क्रमशः ५ हजार, ३ हजार र २ हजार नगद पुरस्कार प्राप्त गर्ने करुणा फाउण्डेसनले जनाएको छ ।