नेचासल्यानले गर्यो एसइईमा उत्कृष्ट अङ्क ल्याउने विद्यालयलाई पुरस्कृत

पौष २०, सोलुखुम्बु । सोलुखुम्बुको नेचासल्यान गाउँपालिकाले माध्यमिक शिक्षा परीक्षा (एसइई) मा उत्कृष्ट अङ्क ल्याउने विद्यालयलाई सम्मान गरेको छ । केही महिना अघि प्रकाशित नतिजा अनुसार २०८० सालको एसइईमा उत्कृष्ट अङ्क ल्याउन सफल विद्यालयलाई सम्मान गरेको हो ।

शुक्रबार पालिका अध्यक्ष धनजन राइको अध्यक्षतामा भएको सम्मान कार्यक्रममा पालिका भित्र सञ्चालित ८५.१८ प्रतिशत अकं ल्याउने भूमेश्वरी मावि, ८३.३३ प्रतिशत अकं ल्याउने केदार मावि तथा बिपि संस्कृत मावि, र ८१.८१ महेद्रदोय माविलाई सम्मान तथा पुरस्कृत गरेको सहकर्मी सोभित ढुगेंलले जानकारी दिनुभयो । कार्यक्रममा बधाई ज्ञापन गर्दै पालिका अध्यक्ष धनजन राईले सामुदायिक विद्यालय पनि उत्कृष्ट नतिजा ल्याउन सक्षम रहेको बताउनुभयो । प्राप्त नतिजाले सामुदायिक विद्यालयबाट पनि उत्कृष्ट अङ्क ल्याएर विद्यार्थी उत्तीर्ण हुनसक्छन् भन्ने सन्देश प्रवाह भएको बताउनुभयो ।

सोही अवसरमा विद्यालयका प्रधानाध्यापकहरुलाई नगद र सम्मान पत्र प्रदान गरिएको छ । यस्तै गाउँपालिका उपाध्यक्ष विना राईले विद्यार्थीलाई शिक्षा तर्फ थप हौसला प्रदान होस भन्ने उद्देश्यले सम्मान गरिएको उल्लेख गर्नुभयो । त्यस्तै पालिकाले २०७९ असार देखि २०८१ साल असार मसान्त सम्म अनिवार्य अवकाश तथा स्वैच्छिक अवकाश प्राप्त २० जना शिक्षकहरुलाई शुक्रबार नेचासल्यान गाउँपालिकाले दोसल्ला ओढाएर सम्मान पत्र सहित सम्मानित गरेको छ ।

उक्त सम्मान कार्यक्रममा प्रमुख प्रसासकिय अधिकृत विशाल घिमिरे, वडा न ४ का वडा अध्यक्ष इन्द्रबहादुर राई, अन्य वडाका वडा अध्यक्ष, कार्यपालिका सदस्य, शिक्षा शाखा अधिकृत माधवमणी ढुंगाना लगायतको उपस्थिति रहेको थियो ।