नेचा अस्पतालको उद्घाटन, नेचाका ३ वटा वडा सहित छिमेकी गाउँपालिकाका बिरामीलाई सहज 

पौष २०, सोलुखुम्बु ।  सोलुखुम्बुको नेचासल्यान गाउँपालिका स्थित नेचा अस्पतालको उद्‌घाटन गरिएको छ ।  नेचासल्यान गाउँपालिकाको लगानीमा निर्मित अस्पतालको शनिबार एक कार्यक्रमका बीच उद्‌घाटन गरिएको हो ।  यस अघि सामुदायिक अस्पतालको रुपमा रहेको अस्पताल सञ्चालन हुन नसकेपछि गाउँपालिकाले हाता लिएर सञ्चालनको जिम्मा लिनेगरी अस्पताल सुचारु गरिएको हो ।  शनिबार गाउँपालिका अध्यक्ष धनजन राई तथा उपाध्यक्ष विना राईले अस्पतालको उद्‌घाटन गर्नुभएको हो ।  गाउँपालिकाको वडा नम्बर ४ बेतघारीमा रहेको अस्पतालले नेचाका ३ वटा वडा सहित अन्य थुलुङ दुधकोशी गाउँपालिकाका केही वडा, खोटाङ जिल्लाका केही वडालाई समेत सेवा दिने विश्वास लिइएको छ ।

 अस्पताल उद्‌घाटन गर्दै गाउँपालिका अध्यक्ष धनजन राईले अस्पताल सञ्चालनको जिम्मेवारी गाउँपालिकाले लिएपछि यसलाई प्रभावकारी रुपमा सञ्चालन गर्ने गाउँपालिका अध्यक्ष धनजन राइृले बताउनुभयो । उहाँले अस्पतालको व्यवस्थापन र सञ्चालन प्रभावकारी ढङ्गले गरिने बताउँदै अस्पताल भुगाेलका हिसाबले सही स्थानमा स्थापना भएको उल्लेख गर्नुभयो । अस्पताल सञ्चालनका लागी एसियन हेरिटेज संस्थासँग सम्झौता भएको भन्दै उहाँले संस्थालाई धन्यवाद दिनुभयो ।  अध्यक्ष राईले अस्पतालमा डाक्टर तथा स्वास्थ्यकर्मीको व्यवस्थापन पालिकाले गर्ने भन्दै लगातार ३ वर्ष सम्म अस्पतालमा रहेर सेवा गर्ने डाक्टर लाई १ लाख रुपैयाँ प्रोत्साहन स्वरुप पुरस्कार दिने समेत प्रतिबद्धता व्यक्त गर्नुभएको छ ।

यस्तै कार्यक्रममा गाउँपालिका उपाध्यक्ष विना राईले नेचा सामुदायिक अस्पताललाई नेचा अस्पताल बनाइँदा इतिहास मेटिएको भन्ने भनाइलाई उदृत गर्दै इतिहास फेर्नु जरुरी रहेकोले यो काम गर्नुपरेको उल्लेख गर्नुभयो ।  उहाँले अस्पताल सञ्चालन प्रभावकारी रुपमा गर्नका लागी सरकारीकरण गर्नुपर्ने आवश्यकता भएको पनि बताउनुभयो । साथै उहाँले एसियन हेरिटेज नेपालले ३ वर्ष सम्म अस्पताल सञ्चालनका लागी वार्षिक रुपमा १८ लाख रुपैयाँ दिने गरि सम्झौता भएको भन्दै बिरामीलाई छिटो स्वास्थ्य सेवा दिनका लागी एम्बुलेन्स समेत तैनाथ राखिएको उल्लेख गर्नुभयो ।

कार्यक्रममा गाउँपालिकाका प्रमुख प्रशासकीय अधिकृत विशाल घिमिरेले पालिकाले गरेको निर्णय कार्यान्वयनमा चुनौति भएपनि प्रशासनिक हिसाबले निर्णय कार्यान्वयन गर्नमा कन्जुस्याँइ नगर्ने पनि बताउनुभएको छ ।

यता कार्यक्रममा बोल्दै पूर्व सांसद भूपाल किरातीले अस्पतालको जिम्मा स्थानीय सरकारले लिएपछि प्रभावकारी रुपमा सञ्चालन हुने विश्वास लिएको बताउनुभयो ।

अस्पताल सञ्चालक समितिका संस्थापक अध्यक्ष भीम किराँतीले अस्पताल सञ्चालनका सुरुवाती दिनमा ठुलो सङ्घर्ष गरिएको स्मरण गर्दै उक्त संघर्षलाई सावित गर्न अबको स्थानीय सरकारले तदारुकताका साथ काम गर्नुपर्ने बताउनुभएको छ ।

यस्तै कार्यक्रममा बोल्ने अन्य वक्ताहरूले कार्यक्रममा अस्पताल सञ्चालन गर्न स्थानीय सरकार लागी परेकोमा धन्यवाद व्यक्त गर्दै प्रभावकारी रुपमा नागरिकले सेवा पाउनुपर्नेमा जोड दिएका छन् ।  उनीहरूले स्थानीय सरकारको तदारुकताले अस्पताल फेरी सञ्चालनमा आएको भन्दै खुसी व्यक्त गरेका छन् ।

अस्पतालको उद्‍घाटन कार्यक्रममा गाउँपालिका अध्यक्ष, उपाध्यक्ष, वडा अध्यक्ष तथ कार्यपालिका सदस्य, पार्टी प्रतिनिधी, विद्यालयका प्रधानाध्यापक तथा शिक्षक एवं सरोकमरवाला स्थानीय लगायतको बाक्लो उपस्थीति रहेको थियो ।