फिक्कल गाउँपालिकाले उत्कृष्ट सासू–बुहारीलाई सम्मान गर्ने

पौष २१, सोलुखुम्बु । सिन्धुलीको फिक्कल गाउँपालिकाले उत्कृष्ट सासू बुहारीलाई सम्मान गर्ने भएको छ । गाउँपालिकाको आर्थिक वर्ष २०८१÷०८२ को वार्षिक कार्यक्रम अन्तर्गत गाउँपालिकाले उत्कृष्ट सासु बुहारीलाई सम्मान गर्ने भएको हो । पारिवारिक मेलमिलाप र घरेलु हिंसा अन्त्य गर्ने उद्देश्यले सम्मान गरिने प्रमुख प्रशासकिय अधिकृत डम्बरबहादुर रजनमगरले बताउनुभयो ।

गाउँघरमा सासू–बुहारीको सम्बन्धलाई नकारात्मक दृष्टिले हेर्ने परिपाटीलाई न्यूनीकरण गर्ने उद्देश्यले समाजमा रहेका अनुकरणीय सासू–बुहारीलाई गाउँपालिकाले हरेक वर्ष सम्मान गर्दै आएको उहाँको भनाई छ । प्रत्येक वडाका उत्कृष्ट सासू–बुहारीलाई खोजी हरेक वर्ष गाउँपालिकाले सम्मान गरिने कार्यलाई निरन्तरता दिने गाउँपालिका अध्यक्ष पार्वति सुनुवारले बताउनुभयो ।

ज्येष्ठ नागरिकलाई गरिने व्यवहार सकारात्मक र बुहारीलाई पनि छोरीसरह व्यवहार होस् भनेर गाउँपालिकाले सम्मान गर्दै आएको र सबै वाडामा यसै प्रकारले सम्मान गरिने उहाँको भनाई छ । गाउँपालिका अध्यक्ष पार्वती सुनुवारले समाजमा सासू–बुहारीबीचको सम्बन्धलाई हेर्ने दृष्टिकोणमा फरक ल्याउनुपर्नेमा जोड दिनुभयो ।

अब सासु होइन आमा र बुहारी नभई छोरीको सम्बन्ध कायम गर्नुपर्ने उहाँको जोड रहेको छ । पालिकाले गत आर्थिक बर्ष २०८०/०८१ मा ६ वटा वडाको ६ जोडी अर्थात १२ जना सासु र बुहारीहरुलाई सम्मान गरेको थियो ।