गरिवी र अपाङ्गताले थलिएका २ बालबालिकाको उद्धार, मायाघरको संरक्षणमा रहने

पौष २१, सोलुखुम्बु ।  खोटाङको ऐसेलुखर्क गाउँपालिका वडा नम्बर १ राखाबाङ्देलका २ बालबालिकाको उद्धार गरि मायाघर नेपाल इटहरी पठाइएको छ  ।  वडा कार्यालय राखाबाङ्देलको पहलमा जिल्ला प्रहरी कार्यालय खोटाङको विशेष सहजिकरणमा उद्धार गरी १ जना बालक तथा १ जना बालिकालाई मायाघर इटहरी पठाइएको हो ।

 उनीहरू मध्ये १ जना बालक स्थानीय रणबहादुर थापाका छोरा अङ्ग बहादुर थापाको घरैबाट उद्धार गरि मायाघर नेपाल इटहरी पठाइएको वडाअध्यक्ष पुरुषोत्तम राजभण्डारीले बताउनुभयो ।  जन्मँदा सामान्य रुपमा जन्मिएका बालक थापालाई जन्मिएको २ वर्षपछि शारीरिक तथा बोली सम्बन्धी अपाङ्गताको समस्या भएको र हाल सम्म पनि उनको अवस्थामा सुधार नआउनुका साथै घरायसी आर्थिक  स्थिति समेत कमजोर भएको अवस्थामा उनको उद्धार गरि पठाइएको हो ।

यस्तै राखाकै बज्र कुमार राईकी छोरी सुजता राईको समेत उद्धार गरि मायाघार पठाइएको हो । गरिब परिवारकी राईको लालनपालनमा समेत समस्या हुने देखिएपछि उनको उद्धार गरि संस्थाको छत्रछायाँमा पठाइएको हो ।  गाउँपालिकाको एम्बुलेन्स मार्फत उनीहरू सबैलाई इटहरी सम्म पुर्‍याइने गाउँपालिका अध्यक्ष गिरेन्द्र बाहदुर राईले बताउनुभयो । मायाघर नेपालका प्रतिनिधि प्रमेश ढकालको रोहबरमा उनिहरुलाई त्यसतर्फ पठाइएको छ  ।