सडक निर्माणको नाममा स्थानीयहरुबाट रकम उठाएको भन्दै सोलुदुधकुण्ड नगरपालिकाको आपत्ति

पौष २१, सोलुखुम्बु । सोलुदुधकुण्ड नगरपालिकाले सडक निर्माणको नाममा स्थानीयहरुबाट आफुखुसी रकम उठाएको भन्दै आपत्ति जनाएको छ । सल्लेरी माथिल्लो टोल, शेर्पा सेवा केन्द्र, जिमि राई उत्थान र क्याम्पस टोल जाने सडक निर्माणका लागि भन्दै आफुखुशी रकम उठाइएको भन्दै नगरपालिकाले आपत्ति जनाएको हो । शनिबार नगरपालिकाले एक विज्ञप्ती जारी गर्दै स्थानीयहरुबाट रकम नउठाउन आग्रह गरेको छ ।

यसप्रति गम्भीर ध्यानकर्षण गर्दै नगरपािलकाले यि कार्य तत्काल बन्द गर्न निर्देशन दिएको छ । नगरपालिकाले बजेट व्यवस्थापन गरी स्थानीयबासीसँग समन्वय गर्दै यो योजना पूरा गर्ने प्रतिबद्धता समेत व्यक्त गरेको छ । यस्तै दुर्गा बक्स गण सुरक्षा गुल्म सल्लेरीले अतिक्रमण गरेको सार्वजनिक बाटो अविलम्ब खोल्न र सडक निर्माण अघि बढाउन सोलुदुधकुण्ड नगरपालिका प्रतिबद्ध रहेको जनाएको छ ।

वडा नम्बर ५ मा अवस्थित दुर्गा बक्स गण सुरक्षा गुल्म सल्लेरीले द्घन्दकालमा अतिक्रमण गरेको जग्गामा सडक निर्माण गर्न नगरपालिका प्रतिबद्ध रहेको सोलुदुधकुण्ड नगरपालिकाका मेयर नाम्गेल जाङ्बु शेर्पाले बताउनुभयो । नेपाली सेनाले कब्जा गरेको सार्वजनिक जग्गा फिर्ता गर्न रक्षा मन्त्रालयसँग पटक पटक अनुुरोध गरिसकेको उहाँको भनाई छ । रक्षा मन्त्रालयको सहमति प्राप्त भए लगतै सल्लेरी माथिल्लो टोल, शेर्पा सेवा केन्द्र, जिमी राई उत्थान, क्याम्पस टोल लगायत क्षेत्रका सडक मार्गलाई छोटो र सहज बनाउन डिपिआर तयार गरी छिटो भन्दा छिटो निर्माण कार्य अघि बढाइने भएको छ ।