सोलुखुम्बुमा भुकम्पले २ घरमा आशिंक क्षति, घरी–घरी आउने भुकम्पको त्रासमा स्थानीय

पौष २३, सोलुखुम्बु । सोलुखुम्बुमा बिहान गएको भुकम्पका कारण दुई घरमा आशिंक क्षति पुगेको छ । जिल्लाको थुलुङ दुधकोशी गाउँपालिका र खुम्बु पासाङ ल्हामु गाउँपालिकामा २ वटा घरमा आशिंक क्षति पुगेको हो । आज बिहान ६ः५० बजे गएको शक्तिबाली भुकम्पका कारण जिल्लाको थुलुङ दुधकोशी ७ देउसा लुरुवाका ५० वर्षीय हर्क बहादुर खत्रीको ढुगां र माटोको गाह्रो, ढुगांको छानो भएको दुई तले घरको माथिल्लो तलाको गारो चकिएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्धारिका प्रसाद घिमिरेले जानकारी दिनुभयो ।

त्यस्तै खुम्बुपासाङ ल्हामु गाउँपालिका ५ हेलाजुङ बस्ने आङ ङिमा शेर्पाको ढुङ्गा, माटो र टिनको छानाको दुई तले घरमा पनि क्षति पुगेको डिएसपी घिमिरेको भनाई छ । घटनापछि प्रहरी टोली प्रहरी चौकी मुक्ली र थाम्बुचेबाट घटनास्थलमा  प्रहरी खटिएको जनाईएको छ । भूकम्पका कारण जिल्लाका विभिन्न स्थानमा भएको क्षतिको थप विवरण भने आउन सकेको छैन । प्रहरी र स्थानीय प्रशासनले क्षतिको मूल्यांकन गरिरहेको छन् ।

भुकम्पको केन्द्र विन्दु चिनको तिब्बत सोलुखुम्बु नजिक पर्ने भएकाले भौतिक संरचनामा क्षति पुगेको हुनसक्ने आँकलन गरिइएको छ । आज बिहान ६ बजेर ५० मिनेटमा नेपाल–चीन सिमानामा ७ म्याग्निच्युडको भूकम्प गएको थियो । राष्ट्रिय भूकम्प मापन केन्द्रका अनुसार भूकम्पको केन्द्रविन्दु चीनको दिङ्गे काउन्टीमा रहेको थियो ।