सगरमाथामा हराइरहेका मंगोलियनको शव फेला, एक अझै बेपत्ता

जेठ ५, सोलुखुम्बु ।  सगरमाथाको चौथो शिविर नजिकबाट ६ दिनदेखि हराइरहेका दुई मंगोलियन अल्पाइनिस्टमध्ये एक जनाको शव फेला परेको छ । ५३ वर्षीय युखजर्गल सिडेनडम्बाको शव शुक्रबार फेला परेको हो । खोज तथा उद्धारमा संलग्न शेर्पा टोलीले ७ हजार ७ सय २ मिटरको उचाइमा शव भेट्टाएको एटके एक्सपिडसनका निर्देशक लाक्पा थेन्डु शेर्पाले जानकारी दिनुभयो ।
शेर्पाका अनुसार गत आइतबार साँझ सगरमाथा चुचुरो नजिकै ७ हजार ९ सय ५० मिटर उचाइमा रहेको चौथो शिविरभन्दा माथिबाट उनी हराएका थिए । चौथो शिविरभन्दा माथिबाट हराइरहेका दुई मंगोलियन आरोहीमध्ये एक जनाको शव फेला परेको हो । ३१ वर्षीय प्योरभ्रिसन खाम्बाजाभ अझै भेटिएका छैन ।

अहिले आरोहणको सिजन भएकाले हिमाल चढ्न जाने आरोहीलाई बाधा पुग्ने भएकाले मृत अवस्थामा भेटिएका मंगोलियन आरोहीको शव भने आधार शिविरमा झार्न कठिनाइ हुने निर्देशक शेर्पाले बताएका छन्। यसपटकको आरोहण सिजन सकिएपछि अर्का मंगोलियनको पनि खोजी गरेर सिडेनडम्बाको शव व्यवस्थापन गरिने उनले बताएका छन ।