खोटाङको साकेला गाउँपालिका बन्यो जिल्लाकै पहिलो पूर्ण खोप सुनिश्चित तथा दिगोपना पालिका  

जेठ ५, सोलुखुम्बु । खोटाङको साकेला गाउँपालिका जिल्लाकै पहिलो पूर्ण खोप सुनिश्चितता तथा दिगोपना पालिका घोषणा भएको छ ।  शुक्रबार गाउँपालिका अध्यक्ष रविप्रकाश राईको अध्यक्षता तथा जिल्ला समन्वय समितिका प्रमुख सन बहादुर राईको प्रमुख आतिथ्यतामा सम्पन्न सभाका बीच समन्वय प्रमुख राईले पालिकालाई पूर्ण खोपसुनिश्चित पालिका भएको प्रमाण पत्र प्रदान गर्नुभएको हो ।

गाउँपालिकाका ५ वटै वडाका खोप पाउनुपर्ने ६ सय ५५ बालबालिकालाई खोप लगाइसकिएको सुनिश्चित भएपछि गाउँपालिकालाई पूर्ण खोप सुनिश्चित पालिका घोषणा गरिएको स्वास्थ्य कार्यालय खोटाङका प्रमुख एवं पुर्ण खोप समन्वय समितिका सदस्य सचिव जीवन चौलागाइँले जानकारी दिनुभयो ।

उहाँले गाउँपालिकाका सबै जन्मे देखी १५ महिना सम्मका १ सय ४८ जना र १६ देखी ५९ महिना सम्मका ५ सय ७ जना बालबालिकालाई खोप सुनिश्चित गरिएको पनि बताउनुभएको छ ।  गाउँपालिकामा यो वर्ष खोप लगाउनुपर्ने वडा नम्बर १ बाँझेच्यानडाँडाबाट १ सय ११ जना बालबालिका थिए । यस्तै वडा नम्बर २ रतन्छाका १ सय ३३ जना, वडा नम्बर ३ खिदिमाका १ सय जना, वडा नम्बर ४ मात्तिमका ९० जना र वडा नम्बर ५ मात्तिमका ७३ जना बालबालिका थिए ।

सबै बालबालिकालाई घरधुरी सर्वेक्षण गरि पूर्ण खोप तथा दिगोपना भएको सुनिश्चित भएपछि पालिकालाइ पुर्ण खोप सुनिश्चित पालिका घोषणा गरिएको गाउँपालिकाको स्वास्थ्य शाखा प्रमुख रिता ढकालले जानकारी दिनुभयो । यस्तै साकेला गाउँपालिका स्थानीय खोप समन्वय समितिले गाउँपालिकाका ५ वटै वडाहरूमा पूर्ण खोप सुनिश्चित भएपछि प्रमाणपत्र वितरण गरेको गाउँपालिका अध्यक्ष राईले बताउनुभयो ।

उहाँले पूर्ण खोप सुनिश्चित पालिका बनाउन लागी पर्ने स्वास्थ्य स्वयंसेवी तथा स्वास्थ्यकर्मी र वडा प्रतिनिधिलाई धन्यबाद व्यक्त गर्नुभएको छ । जिल्लाका अन्य ९ वटा पालिकाहरूले पूर्ण खोप सुनिश्चितता तथा दिगोपना पालिका घोषणा गर्न बाँकी छ । 

यो समाचार पढेर तपाँइले कस्तो महशुस गर्नुभयो ?