ताप्ली तीनमा व्यवसायीक अकबरे खोर्सानी खेती सम्बन्धी तालिम

पौष २५, सोलुखुम्बु । उदयपूरको ताप्ली गाउँपालिका वडा नम्बर ३ इनामेको मडीरेमा व्यवसायीक अकबरे खोर्सानी खेती सम्बन्धी तालिम सम्पन्न भएको छ । ताप्ली गाउँपालिका, सहयोगी हातहरुको समूह (सहास) नेपाल सहयोग तथा सुनकोशी बिकास समाज ताप्ली गाउँपालिकाको आयोजनामा दुई दिने तालिम सम्पन्न भएको हो । पालिकाको विभिन्न वडामा रहेका ११ वटा कृषक समूहका २६ जना कृषक सदस्यहरुलाई तालिम दिइएको सहास नेपालले जनाएको छ ।

कृषि प्रवर्धन गरि कृषकहरुको आयआर्जन वृद्धि गर्न एकल तथा सामूहिक रुपमा अकबरे खोर्सानीको व्यावसायिक खेति गर्ने उद्धेश्यले यो कार्यक्रम आयोजना गरिएको सहकर्मी ठविन्द्र मगरले जानकारी दिनुभयो । ताप्लीको केही भूभागमा अकबरे खोर्सानी खेति गर्न उपयुक्त हावापानी भएको साथै यो वर्ष ३० देखि चालिस हजार बेर्ना उत्पादन गरेर खेति गर्ने हेतुले कार्यक्रम समेत अगाडी बढाइएको छ । कृषकहरुले उत्पादन गरेको खोर्सानी बजारसम्म पुर्याउन गाउँपालिका र सहयोगी संस्थाले सहयोग गर्ने सहकर्मी मगरले बताउनुभयो ।

व्यावसायिक अकबरे खोर्सानी खेति प्रभावकारी र कृषकहरुको जीवनस्तर उकास्न गाउँपालिकाले कृषि प्रवर्धनात्मक कार्यक्रमहरु कार्यन्वयनमा ल्याउन कृषक, साझेदारी संस्था, कृषि प्राबिधिकहरुबाट कृषकहरुले व्यावसाय गर्दै आउनुभएको खेतिको अनुगमन र सल्लाह सुझाव साथै अन्य प्राबिधिक सहयोग गर्न पालिका सधै सकारात्मक रहेको गाउँपालिका अध्यक्ष ढुङ्गराज विश्वकर्माले प्रतिबद्धता व्यक्त गर्नुभयो । तालिमको सहजीकरण ताप्ली गाउँपालिका वडा नं ३ का कृषि प्राविधिक सुदन कुमार वली र सहासका कर्मचारी बेलु सुन्दासले गर्नुभएको थियो ।