सोलुखुम्बुको नेचासल्यानमा सुरु भयो अपाङ्गता पहिचान तथा पुनर्स्थापना शिविर, पहिलो  दिन ४१ जनाले  लिए सेवा 

जेठ ५, साेलुखुम्बु । सोलुखुम्बुको नेचासल्यान गाउँपालिका वडा नम्बर १ मा अपाङ्गता परिचयपत्र वितरण तथा आवश्यकता पहिचान शिविर सुरु भएको छ । कोशी प्रदेश सामाजिक विकास मन्त्रालय, करुणा फाउण्डेसन र नेचासल्यान गाउँपालिकाको संयुक्त साझेदारीमा एवं राष्ट्रिय अपाङ्ग महासङ्घको प्राविधिक सहयोगमा सञ्चालित अपाङ्गता पुनर्स्थापना तथा रोकथाम कार्यक्रम अन्तर्गतको शिविर सल्यानबाट सुरु  भएको हो ।

शिविरको पहिलो दिन आज वडा नम्बर १ सल्यानका ३२ जना सेवाग्राहीको अपाङ्गता परिचयपत्र नवीकरण गरिएको छ भने ९ जना लाई नयाँ परिचयपत्र वितरण गरिएको छ । जसमध्ये ५ वटा रातो परिचयपत्र नवीकरण भएको जनाईएको छ । यस्तै २८ वटा निलो र ४ वटा पहेँलो परिचयपत्र नवीकरण गरिएको छ । गाउँपालिकामा अपाङ्गता रोकथाम तथा पुनर्स्थापना शिविर सञ्चालन भएपछि यसले गाउँपालिकामा अपाङ्गता भएकाहरूको संरक्षण र आधारभुत विकासमा टेवा पुग्ने गाउँपालिकाले जनाएको छ ।  

साथै अपाङ्गता रोकथामका लागी यो कार्यक्रम कोशेढुङ्गा सावित हुने पालिका अध्यक्ष धनजन राईले विश्वास  व्यक्त गर्नुभएको छ ।  गाउँपालिकाको वडा नम्बर १ स्थित भूमेश्वरी माविमा सञ्चालित शिविरमा पालिका अध्यक्ष धनजन राई र उपाध्यक्ष विना राईको उपस्थिति रहेको थियो । गाउँपालिकाका सबै ५ वटै वडामा अपाङ्गता भएकाहरूको आवश्यकता पहिचान शिविर जेठ ९ गते सम्म सञ्चालन हुने छ ।