प्रधानमन्त्री रोजगार कार्यक्रम : चिशंखुगढीका ७४ जना श्रमिकलाई रोजगारी

पौष २८, सोलुखुम्बु । ओखलढुगांको चिशंखुगढी गाउँपालिकामा प्रधानमन्त्री रोजगार कार्यक्रम मार्फत ७४ जनाले रोजगारी पाएका छन् । सरकारले बेरोजगारहरूलाई लक्षित गरी सुरु गरेको प्रधानमन्त्री रोजगार कार्यक्रमबाट पालिका भित्रका उक्त संख्याका नागरिकहरुले रोजगारी पाएका हुन् । बेरोजगारहरूलाई गाउँमै रोजगारी दिने उद्देश्य अनुसार सुरु भएको प्रधानमन्त्री रोजगार कार्यक्रमको प्राथमिकता बाटो, सडक, निर्माण थालिएको रोजगार सेवा केन्द्र चिशंखुगढीका रोजगार संयोजक छवि भट्टराईले जानकारी दिनुभयो ।

प्रधानमन्त्री रोजगार कार्यक्रम अन्तर्गत गाउँपालिकाभित्र ८ वटा योजना छनौट भएका छन् । सो योजनाका लागि पालिकाको आर्थिक बर्ष २०८१/०८२ मा ७४ जनाले १०० दिनका लागि रोजगारी पाएका छन् । प्रधानमन्त्री रोजगार कार्यक्रममा संलग्न युवाहरूले दैनिक ८ सयका दरले ज्याला पाउने रोजगार संयोजक भट्टराईको भनाई छ । गत आर्थिक बर्षमा गाउँपालिकाको ८ वटै वडाका ८५ जना श्रमिकले रोजगारी पाएका थिए ।

नेपालको संविधानको मौलिक हक र कर्तव्य अन्तर्गत धारा ३३ मा रहेको रोजगारीको हकलाई कार्यान्वयन गर्न नेपाल सरकारले रोजगारीको हक सम्बन्धी ऐन, २०७५ जारी गरेको छ । ऐनको दफा ८ को उपदफा (१) मा नेपाल सरकार, प्रदेश सरकार तथा स्थानीय तहले आवश्यक रोजगार कार्यक्रम सञ्चालन गर्न सक्ने प्रावधान रहेको र उपदफा (३) ले कार्यक्रम सञ्चालन सम्बन्धी अन्य व्यवस्था तोकिए बमोजिम हुने व्यवस्था रहेको छ ।