जिल्ला प्रशासन कार्यालय सोलुद्धारा ६ महिनामा ९ जनालाई गैरआवासीय नेपाली नागरिकता वितरण

पौष २८, सोलुखुम्बु । जिल्ला प्रशासन कार्यालय सोलुखुम्बुले ९ जना गैरआवासीय नेपाली नागरिकलाई नागरिकता वितरण गरेको छ । जिल्ला प्रशासन कार्यालयले आर्थिक बर्ष २०८१/०८२ को पहिलो ६ महिनामा अन्य मुलुकमा बसोबास गर्दै आएका ९ जना नेपाली नागरिकलाई नागरिकता वितरण गरेको हो । गत साउन महिना देखि हाल सम्म ५ जना महिला र ४ जना पुरुषलाई नागरिकता वितरण गरिएको सहायक प्रमुख जिल्ला अधिकारी रुपेश विश्वकर्माले जानकारी दिनुभयो ।

यस्तै गैर आवासीय नेपालीलाई राजनीतिक तथा प्रशासनिक अधिकार बाहेकका आर्थिक, सामाजिकलगायत अधिकार हुने प्रमुख जिल्ला अधिकारी अनोज कुमार घिमिरले बताउनुभयो । नागरिकतासम्बन्धी ऐनको दफा ७ (क) १ मा विदेशी मुलुकको नागरिकता प्राप्त गरी दक्षिण एसियाली क्षेत्रीय सहयोग सङ्गठनको सदस्य राष्ट्रबाहेकका देशमा बसोबास गरेको र साविकमा वंशजको वा जन्मका आधारमा निज वा निजको बाबु वा आमा, बाजे वा बज्यै नेपालको नागरिक रही पछि विदेशी मुलुकको नागरिकता प्राप्त गरेको व्यक्तिले आर्थिक, सामाजिक तथा सांस्कृतिक अधिकारको उपभोग गर्न पाउने गरी गैरआवासीय नेपाली नागरिकता प्राप्त गर्न सक्ने व्यवस्था छ ।

गैर आवासीय नागरिकता पाएकाहरूले राजनीति गर्न, सरकारी पदमा बस्न र भोट हाल्न पाउने छैनन् । तर, उनीहरूले नेपालमा व्यवसाय गर्न र नेपालमा सम्पत्ति राख्न भने पाउने कानुनी प्रावधान रहेको छ ।