हिमालयन एथ्निक गायन प्रतियोगिता २०२४ मा फुटी शेर्पाको उत्कृष्ट प्रदर्शन

पौष २८, सोलुखुम्बु । नेपाली गायिका फुटी शेर्पाले भारतको सिलगुडीमा आयोजित अन्तर्राष्ट्रिय गायन प्रतियोगितामा उत्कृष्ट प्रदर्शन गर्दै दोस्रो स्थान हासिल गरेकी छिन् । गत जनवरी ११ तारिखमा सम्पन्न भएको ‘टप थ्री लाइभ प्रस्तुति’ मा उनले शेर्पा भाषाको गीतमा टुंना बजाएर द थ्री सिज ब्याण्डसँग मिलेर विशेष प्रस्तुति दिएकी थिइन् ।

बर्णमाला परिवारले आयोजना गरेको यस प्रतियोगितामा नेपालबाट छनोट भएर फुटी फाइनलमा पुगेकी थिइन्। यसअघि, उनले नेपालमा आयोजित हिमालयन एथ्निक गायन प्रतियोगिता २०२४ मा पनि दोस्रो स्थान हासिल गरिसकेकी छन् । उनले यस सफलतामा सहयोग गर्ने सबैलाई धन्यवाद दिँदै वर्णमाला परिवार, सिक्किम सरकारका मुख्यमन्त्री प्रेम सिंह तामाङ–गोलाई र सबै संगीतकारहरूलाई विशेष धन्यवाद व्यक्त गरेकी छिन् । इलाम, माइजोग्माई गाउँपालिका–६, प्याङ्ग निवासी शेर्पा  हाल हिमालयन शेर्पा सांस्कृतिक केन्द्रका सचिव साथै शेर्पा समुदायको चर्चित टुङ्ना (डाम्ङ्यान) बाधक र विभिन्न राष्ट्रिय पुरस्कार तथा सम्मान प्राप्त रेडियो नेपालबाट स्वर परीक्षा उत्तीर्ण पहिलो शेर्पा महिला गायिका समेत हुन् ।