राष्ट्रिय भुमि आयोग सोलुखुम्बुको अध्यक्षमा गुरुङ नियुक्त

पौष २९, सोलुखुम्बु । राष्ट्रिय भुमि आयोग सोलुखुम्बुको अध्यक्षमा नातिकाजी गुरुङ नियुक्त हुनुभएको छ । भूमि व्यवस्था, सहकारी तथा गरिबी निवारणमन्त्री बलराम अधिकारीले जिल्लाको थुलुङ दुधकोशी गाउँपालिका ४ का नातिकाजी गुरुङलाई अध्यक्षमा नियुक्त गर्नुभएको हो ।

सोमबार सरकारले सोलुखुम्बु सहित  ७१ वटा जिल्लामा भूमि आयोगका अध्यक्ष नियुक्त गरेको छ । गठबन्धनमा रहेका नेपाली कांग्रेस र नेकपा एमालेले भागबन्डा गरेर आयोगमा जिल्ला अध्यक्ष र सदस्य नियुक्त गरेका हुन् । भूमि व्यवस्था तथा सहकारीमन्त्री बलराम अधिकारीले नवनियुक्त अध्यक्षहरूलाई शपथ समेत गराउनुभएको छ ।

सत्तारूढ नेकपा एमाले र नेपाली कांग्रेसले ३५–३५ वटा जिल्ला र सात वटा जिल्लामा मधेश केन्द्रित दललाई भाग दिइएको छ । शपथ कार्यक्रममा मन्त्री अधिकारीले अब बन्ने भूमि समस्या समाधान आयोगले जग्गासम्बन्धी सबै समस्याहरूको अन्त्य गर्ने दाबी गर्नुभयो ।