चाडपर्वलाई विकृति नभई वास्तविक रुपमा मनाउने विश्व शेर्पा संघको निर्णय

माघ ३, सोलुखुम्बु । विश्व शेर्पा संघले शेर्पा धर्म, संस्कृतिमा आधारित पूजा पाठ, कर्म काण्ड तथा अन्य कार्यहरु सरल रुपमा मनाउने निर्णय गरेको छ । संघको आजको बैठकले चाडवाडलाई सरल रुपमा मनाउने निर्णय गरेको हो । शेर्पा समुदायको विवाहमा केही देशहरुमा फेमारको साट्टो बिभिन्न ब्राण्डको रक्सीको बोतल राख्ने र आधुनिक् खालको केक काट्ने गरेको हुँदा त्यसलाई महत्व नदिई फेमारलाई नै महत्व दिने निर्णय पनि गरेको छ ।

यस्तै शेर्पाहरुको मूख्य चाड लोसार ल्हप्सो, बुद्ध जयन्ती तथा अन्य पूजापाठ लगायतका कार्यक्रमहरु बास्तबिक तिथिमिति र समय सीमाभन्दा अर्को फरक समयमा गरिने भएको हुँदा जनस्तरमा बिस्तारै त्यसको महत्व हराउने, पिकनिकमा परिणत हुने र लोप हुने खतरा बढेको हुँदा वास्तबिक समय सीमाभित्र तिथिमितिमा आधारित भएर गर्ने निर्णय गरेको बिश्व शेर्पा संघका बरिस्ठ उपाध्यक्ष नीमा शेर्पाले बताउनुभयो ।

शेर्पाहरुको परापूर्व कालदेखि मान्दै आएको महान चाड ग्याल्पो लोसारको औपचारिक कार्यक्रमहरु आयोजना गरिंदा लोसार मात्र लेख्दा फरक फरक तिथि मिति र समयमा भिन्न लोसारहरु मान्ने भएको हुँदा शेर्पा समुदायमा भविष्यमा कुनै दुबिधा नपरोस भन्ने हेतुले शेर्पाहरुको महान् चाड ग्याल्पो लोसार भनेर अधिकारिक पोस्टर तथा ब्यानरहरु स्पस्ट रुपमा लेख्नु पर्ने निर्णय गरेको बिश्व शेर्पा संघका महासचिव आङ जाङ्बु शेर्पाले जानकारी दिनुभयो । त्यस्तै बैठकले जापान र अमेरिकामा महाधिबेशनबाट चयन भएका नयाँ कार्यसमिति बधाई तथा शुभकामना ज्ञापन गरेको छ ।