शिविरको पहिलो दिन नेचाका १ सय बढी महिलाले लिए पाठेघर सम्बन्धी सेवा

माघ ४, सोलुखुम्बु । सोलुखुम्बुको नेचासाल्यान गाउँपालिकामा पाठेघर सम्बन्धी शिविरको पहिलो दिन १ सय बढी महिलाले सेवा लिएका छन् । शुक्रबारबाट सुरु भएको शिविरको पहिलो दिन १०८ जना महिलाले सेवा लिएका हुन् । मानव अधिकार शान्ति र विकास मन्च नेपालको आयोजना तथा नेचासल्यान गाउँपालिकाको समन्वयमा शिविर आयोजना गरिएको नेचासल्यान गाउँपालिका उपाध्यक्ष विना राईले जानकारी दिनुभयो ।

अझैपनि गाउँघरमा महिलाहरु प्रजनन् र यौन सम्बन्धिका समस्याहरु लुकाउने गरेको र परिवारमा खुलेर नभन्ने, उपचारको लागि अपस्ताल नजानेजस्ता समस्या रहेकाले गाउँपालिकामै शिविर सञ्चालन गरिएको उहाँको भनाई छ । नेचा अस्पतालका स्वास्थ्यकर्मीहरु पुजन सुब्बा र जाङ्मु शेर्पा लगायतको टिम शिविरमा सक्रियताका साथ खटिरहेका छन्, भने भोली ५ गते सम्म शिविर जारी रहने गाउँपालिकाले जनाएको छ ।