माघ ७, सोलुखुम्बु । सोलुखुम्बुको माप्य दुधकोशी गाउँपालिका वडा नम्बर १ र ७ को बीचमा पर्ने ठानेखोला भिरको डढेलो अझै नियन्त्रणमा आउन सकेको छैन् । आईतबार दिउँसो दुधकोशी सामुदायिक वन क्षेत्रबाट सुरु भएको आगलागी साँझ केही कम भएपनि आज सोमबार बिहानबाट फेरी फैलिन थालेको हो । डढेलो नियन्त्रणका लागि नेपाली सेना, सशत्र प्रहरी र नेपाल प्रहरीको टोली फिल्डमा खटिएका छन् ।
स्थलगत अवस्था बुझ्न र आगो नियन्त्रणका लागि माप्य दुधकोशी गाउँपालिका उपाध्यक्ष गौरब राई, कार्लपालिका सदस्य आङकाजी शेर्पा, स्थानीय यूवाहरुको टोली पनि त्यहाँ खटिरहेका छन् । अप्ठेरो भूगोल र हावाहुरी चलिरहेको हुनाले आगो निभाउन समस्या भइरहेको बताइएको छ । डढेलो बढ्दै जाँदा अहिले थालडाँडा कटेर खुम्बु क्षेत्रमा पर्ने सगरमाथा सामुदायिक वन क्षेत्रको भागमा आगो फैलिरहेको माप्य दुधकोशी गाउँपालिकाका उपाध्यक्ष गौरव राईले जानकारी दिनुभयो ।
यो डढेलो अझै नियन्त्रणमा लिन नसकेको खण्डमा सिबुचे, खुम्बुको पाङगोम् हुँदै सगरमाथा राष्ट्रिय निकुञ्ज पुग्नेछ र गाउँ पस्न सक्ने सम्भावना पनि त्यतिकै रहेको छ । त्यसो हुन नदिन सम्बन्धित निकाय, जनप्रतिनिधि र सरोकारवालाहरुले तदारुकता देखाउनुपर्ने भनाई उहाँको छ । आगलागी कसरी सुरु भयो यसको कारण भने अहिलेसम्म खुल्न सकेको छैन् ।
Discussion about this post