नेचासल्यानको प्रशासकिय भवन हस्तान्तरण, आउँदो फागुन ७ गते उदघाटन गरिने

माघ ९, सोलुखुम्बु । नेचासल्यान गाउँपालिकाको प्रशासकिय भवन निर्माण कम्पनीले पालिकालाई हस्तान्तरण गरिएको छ । बुधबार गाउँपालिका र निर्माण कम्पनी बिच भएको सम्झौता अनुसारको कार्य सम्पन्न गरि कम्पनीका म्यानेजिङ डाइरेक्टर विजय सुनारले गाउँपालिकाका अध्यक्ष धनजन राईलाई चाबी सहित हस्तान्तरण गर्नुभएको छ ।

गाउँपालिकाले वि.सं २०८० साल चैत्र २२ गते कम्पनीसँग सम्झौता गरी जेठ १६ बाट आरोन ओम बालाजी इ आर रामेछापले काम अगाडी बढाई समय अवधिमै गाउँपालिकालाई जिम्मा लगाइएको जनाइएको छ । नेचासल्यान गाउँपालिकाको ४० प्रतिशत र सङ्घ सरकारको ६० प्रतिशत गरी कुल ३ करोड ७२ लाख बजेटमा भवन निर्माण गरिएको पालिकाका सूचना अधिकारी युवराज पोखरेलले जानकारी दिनुभयो ।

निर्माण कम्पनीले भवन हस्तान्तरण गरेसँगै आउँदो फागुन ७ गते उदघाटन गरिने गाउँपालिका अध्यक्ष धनजन राईले बताउनुभयो । ५ तले सुविधा सम्पन्न प्रशासनिक भवन निर्माण भएपछि गाउँपालिका बासीलाई प्रशासनिक सेवा प्रवाहमा थप सहजता हुने गाउँपालिकाले जनाएको छ ।