सभापति बेगर नै बस्यो काँग्रेस सोलुको ईत्तर समुहको बैठक

माघ १२, सोलुखुम्बु । जिल्ला सभापतिको अनुपस्थितिमै नेपाली काँग्रेस सोलुखुम्बुको संस्थापन ईत्तर समुहको बैठक बसेको छ । क्रियाशिल सदस्यता नविकरणको लागि केन्द्रबाट परिपत्र भए लगत्तै जिल्ला सभापति नाम्गेलजाङ्बु शेर्पा विदेशमा भएको बेला जिल्ला उपसभापति घनराज सुनुवारको सभापतित्वमा ईत्तर समुहको बैठक पार्टी कार्यालय बसन्तबजारमा बसेको हो । बैठकले क्रियाशिल सदस्यता नविकरण, पार्टी संगठन विस्तार, भातृ संस्थाको सदस्यता नविकरण र नयाँ क्रियाशिल सदस्यताको विषयमा निर्णय गरेको जिल्ला सचिव युवराज घिमिरेले जानकारी दिनुभयो ।

जिल्ला सभापतिले बोलाएको बैठकमा सहभागिता नजनाउँदै आएको ईत्तर समुहले छुट्टै बैठकको आयोजना गरि पार्टी महामन्त्रिले दिएको समय सिमा भित्रै क्रियाशिल सदस्यता नविकरण गरिसक्ने र उक्त कार्यका लागि पालिका सभापतिले सहजिकरण गर्ने निर्णय गरेको छ । त्यस्तै बैठकले नयाँ सदस्यता वितरण र नविकरणमा अनिवार्य रुपमा पालिका सभापति र वडा सभापति मार्फत मात्रै गराउन केन्द्रमा परिपत्र गर्ने निर्णय गरेको सचिव घिमिरेले जानकारी दिनुभयो ।

काँग्रेस केन्द्रिय सदस्य बलबहादुर केसी पक्षिय जिल्ला स्तरका नेता, निर्वाचित जनप्रतिनिधि र भातृ संस्थाका प्रतिनिधिहरुले बैठकमा जिल्ला नेतृत्वको आलोचना गरेका थिए । बैठकमा पुर्व जिल्ला सभापति विनोदकुमार बस्नेत, जिल्ला सचिव द्वय युवराज घिमिरे र भलाकाजि राई, कोशी प्रदेश सदस्य जय प्रसाद राई, काँग्रेस नेता तथा सोताङ गाउँपालिका अध्यक्ष खिलराज बस्नेत, काँग्रेस नेता प्रकाशसिंह कार्की, प्रदेश सभा क का सभापति तथा नेचासल्यान गाउँपालिका अध्यक्ष धनजन राई, अधिकांश महाधिबेशन प्रतिनिधिहरु, जिल्ला सदस्य लगायतको सहभागिता रहेको थियो । ईत्तर समुहको बैठक बस्दै गर्दा जिल्ला सभापति नाम्गेलजाङ्बु शेर्पा जापानमा छन् भने केन्द्रिय सदस्य बलबहादुर केसी अष्ट्रेलिया र केन्द्रिय सदस्य आङगेलु शेर्पा पार्टीको सय दिने अभियानका क्रममा बैतडी जिल्लामा छन् ।