केपिलासगढीमा करोडौँको लगानीमा तोरी प्रशोधन केन्द्र खुल्दै

गृष्मा शेर्पा÷ १३ माघ । केपिलासगढी गाउँपालिका खोटाङमा तोरी प्रशोधन केन्द्र स्थापना हुने भएको छ । गाउँपालिका, जि फाउन्डेसन नेपालको संयुक्त लगानीमा तोरी संकलन, प्रशोधन साथै ब्रान्डिङ केन्द्र स्थापना हुने भएको हो । खाद्य विज्ञ टिम सँग समन्वय गरी उक्त केन्द्र चाडै स्थापना गर्ने गरी कार्य थालनी गरिएको पालिका अध्यक्ष समिर राईले बताउनुभयो ।

करिब ४ रोपनी जग्गामा गाउँपालिका र जि फाउन्डेसन नेपालको लगानीमा उक्त कार्य सञ्चालन गर्न लागिएको अध्यक्ष समिर राईले बताउनुभएको छ । बर्षेनी ६ करोड सम्मको तेल आयात हुँदै आएको उक्त पालिकालाई तोरी तेलमा आत्मनिर्भर बनाउने लक्ष्यका साथ प्रशोधन केन्द्र खोल्न लागिएको हो ।शनिबार पालिका केन्द्र बाक्सिलामा जी फाउन्डेसनका प्रतिनिधि र पालिका अध्यक्ष बिच भएको प्रारम्भिक छलफलमा चाडै विज्ञ टोली झिकाई प्याकेजिङ र ब्रन्डिङ समेतको काम हुने गरी बृहत प्रशोधन केन्द्र खोल्ने गृहकार्य सुरु भएको हो ।

उक्त परियोजनाका लागि लागत रकम यकिन नभए पनि करोड भन्दा माथि लाग्ने अनुमान गरिएको छ । हाल उक्त पालिकाको विधिन्न वडामा स्थानिय सरकारकै पहलमा कृषकहरुले तोरीको व्यवसायिक खेति गदै आइरहेका छन् । तोरी खेतीले मौरी पलन र तेलहन दुवैमा उपयोगी हुने भएकाले पनि कृषकको आर्कषण बढेको हो ।