डिभिजन वन कार्यालय सोलुखुम्बुद्वारा वन डढेलो नियन्त्रण सम्बन्धी उपकरण हस्तान्तरण तथा अन्तरक्रिया

माघ १३, सोलुखुम्बु । सोलुखुम्बुको सदरमुकाम सल्लेरीमा (आइतबार) वन डढेलो नियन्त्रण सम्बन्धी अन्तरक्रिया कार्यक्रम सम्पन्न भएको छ । डिभिजन वन कार्यालय सोलुखुम्बुको आयोजनामा सरोकारवालाहरु सँग गरिएको अन्तरक्रिया कार्यक्रम सम्पन्न भएको हो । डिभिजन वन कार्यालय सोलुखुम्बुका प्रमुख रामजी शाहको अध्यक्षता तथा जिल्ला समन्वय समितिका प्रमुख कृष्ण प्रसाद निरौलाको प्रमुख आतिथ्यतामा आयोजित अन्तक्रिया कार्यक्रम सँगै जिल्लाका तीन वटै निकायका सुरक्षाकर्मीहरुलाई वन डढेलो नियन्त्रणका लागि आवश्यक उपकरण हस्तान्तरण गरिएको छ ।

डिभिजन वन कार्यालयका सूचना अधिकारी मनराज राईका अनुसार वन कार्यालयले आगो निभाउन प्रयोग गरिने झोला ८,८ थान, पत्कर सोर्ने सामाग्री ५,५ थान र पिटेर आगो निभाउने समाग्री ३÷३ थान नेपाल प्रहरी, शसस्त्र प्रहरी र नेपाली सेनालाई वितरण गरेको हो । अन्तरक्रिया कार्यक्रममा बोल्दै जिल्ला वन समन्वय समिति सोलुखुम्बुका अध्यक्ष एवंम समन्वय प्रमुख कृष्ण प्रसाद निरौलाले वन क्षेत्रमा लाग्ने डढेलो तथा आगलागीलाई नियन्त्रण गर्नका लागि सबै पक्ष चनाखो भएर लाग्नुपर्ने बताउँदै वनमा डढेलो र आगो लगाउनेहरुलाई कानुनी दायरामा ल्याउनुपर्ने बताउनुभयो ।

यस्तै जिल्ला विपद व्यवस्थापन समितिका अध्यक्ष तथा प्रमुख जिल्ला अधिकारी अनोज कुमार घिमिरेले वन डढेलो निणन्त्रणमा सबै सरोकारवाला कटिबद्ध रहेर काम गर्न सबैमा आग्रह गर्नुभएको छ । डिभिजन वन कार्यालय सोलुखुम्बुका प्रमुख रामजी शाहले वन डढेलो र आगलागी सामुहिक प्रयासबाट मात्रै सम्भव हुने उल्लेख गर्नुभयो । कार्यक्रममा सहभागी वन क्षेत्रका सरोकारवालाहरुले जथाभावी रुपमा वनजङ्गल क्षेत्रमा लाग्ने आगलागीलाई नियन्त्रणमा लिनुपर्ने र समुदायमा सचेतना फैलाउन आवश्यक रहेकोमा जोड दिएका छन् । उनीहरुले स्थानीय तहले वन क्षेत्रको जग्गा भाडामा लगाउन नहुने, वनजङ्गलको पातपतिङ्गरको व्यवस्थापन गर्नुपर्ने सुझाव दिए ।