रक्षामन्त्री राईले गरे सत्संग सामुदायिक भवनको शिलान्यास

माघ १४, सोलुखुम्बु । रक्षामन्त्री मानबीर राईले नेचासल्यान गाउँपालिकाको वडा नम्बर ३ स्थित सत्संग सामुदायिक भवनको शिलान्यास गर्नुभएको छ । जमरकट्टेल सेवा प्रतिष्ठानले भारद्वाज ऋषि आश्रम एकीकृत विकास परियोजना अन्तर्गत निर्माण गर्न लागेको सो भवनको मन्त्री राईले आज शिलान्यास गर्नुभएको हो । जमरकट्टेल सेवा प्रतिष्ठान नेपालका अध्यक्ष देवेन्द्र जमर कटेलको अध्यक्षतामा भवनको शिलान्यास गरिएको सहकमी धनकुमार ढुगेंलले जानकारी दिनुभयो ।

माघ ९ गतेबाट टीएन ए कन्ट्रक्सनले २९ लाख ५९ हजार ९ सय ९२ रुपैयाँमा निर्माण प्रारम्भ गरेको सो भवन आगामी बर्षको असार १५ गते सम्पन्न गर्न लक्ष्य रहेको प्रतिष्ठानका महासचिव प्रेम प्रसाद जमरकट्टेलले जानकारी दिनुभयो । उक्त भवनमा सत्संग हल, कैलाशेश्वर मन्दिर क्षेत्र बिकास समितिको कार्यालय र संग्राहलय रहने उल्लेख गनुभयो । भवन निर्माणका लागि रक्षामन्त्री राईकै पहलमा चालु आर्थिक बर्षको बजेटमा संघीय सरकारबाट ४५ लाख बजेट बिनियोजन भएको प्रतिष्ठानले जनाएको छ ।

शिलान्यास कार्यक्रमा बोल्दै रक्षामन्त्री राईले निर्वाचनको बेला सत्संग सामुदायिक भवन निर्माण गर्ने प्रतिबद्धता पूरा भएको बताउनुभयो । धर्म, संस्कार र संस्कृतिको संरक्षण सबैको दायित्व भएको उहाँको भनाई छ । यस्तै नेचासल्यान गाउँपालिकाका संस्थापक अध्यक्ष डुफकुमार बास्तोलाले विकासका लागि सरकारको मुख ताक्दा काम पूरा नहुने भएकाले विकास आफैबाट गर्नु पर्ने बताउनुभयो ।