विद्यालयमा सिकाइयो कपाल बाट्न र काट्न 

जेठ ८, सोलुखुम्बु ।  खोटाङको दिक्तेल रूपाकोट मझुवागढी नगरपालिकाको एक विद्यालयमा विद्यार्थीहरूलाई कपाल बाट्न र काट्न सिकाइएको छ ।  नगरपालिकाको वडा नम्बर १४ बुइपा स्थित चम्पावती माध्यमिक विद्यालयमा आज मंगलबार विद्यार्थीहरूलाई कपाल काट्ने र बाट्ने सीप सिकाइएको हो ।

नगरपालिकाले हरेक मंगलबार जीवनोपयोगी शिक्षाको बार घोषणा गरे सँगै यहाँका सबै ९३ वटै सामुदायिक विद्यालयहरूमा हरेक मंगलबार जीवनोपयोगी शिक्षा दिइदै आएको हो । सोही अन्तर्गत चम्पावती माविका विद्यार्थीलाई विद्यालयका छात्रहरूलाई कपाल काट्न र छात्राहरूलाई कपाल बाट्ने सीप सम्बन्धी ज्ञान दिइएको प्रधानाध्यापक खगेन्द्र राईले जानकारी दिनुभयो ।

दैनिक जीवनमा विद्यार्थीहरूले कपाल काट्ने र बाट्ने कार्य नियमित हुने र कपाल काट्नकै लागी निकै समय खर्चिनुपर्ने अवस्थालाई हेर्दै कपाल काट्ने सीप दिइएकाले अव उनीहरूलाई कपाल काट्न मान्छे खोजीरहनु पर्ने बाध्यता नरहने बताउनुभयो । यस्तै छात्रहरूले पनि कपाल बाट्नको लागी एकअर्काको सहयोग लिन सक्ने उहाँको भनाई छ ।

उहाँले नगरपालिकाले हरेक मङ्गलबारलाई किताबी ज्ञान भन्दा बाहिर जीवनोपयोगी र व्यवहारिक ज्ञान सिकाउने भनेर तालिमको व्यवस्थापन गरेपछि अहिले विद्यालयका विद्यार्थीहरूलाई विभिन्न खालका जीवनोपयोगी ज्ञान दिइदै आएको बताउनुभयो । उहाँले विद्यालयमा २ हप्ता देखी यस्तो अभ्यास गरिँदै आएको बताउनुभयो । यस अघिको हप्ता विद्यालयमा निर्वाचन प्रक्रियाद्वारा  स्कुल क्याप्टेन,  भाइस क्याप्टेन, हाउस क्याप्टेन, हाउस भाइस क्याप्टेन, क्लास मनिटर चुन्न सिकाइएको जानकारी बताउनुभयो ।