उदयपुरको लिम्चुङबुङलाई २०८४ भित्र  बालमैत्री पालिका घोषणा गरिने 

जेठ ८, सोलुखुम्बु ।  उदयपुरको लिम्चुङबुङ गाउँपालिकाले स्थानीय बालमैत्री शासन अवलम्बन र घोषणा गर्ने प्रतिवद्धता व्यक्त गरेको छ । सोमबार गाउँपालिकाका सबै सरोकारवालाले प्रतिबद्धता   पत्रमा हस्ताक्षर गर्दै स्थानीय सरकारको रुपमा बालमैत्री शासन युक्त सरकार घोषणा गर्ने प्रतिबद्धता पत्रमा हस्ताक्षर गरेका हुन ।

 गाउँपालिकामा गत ५ गते देखी ७ गते सम्म सञ्चालित बालमैत्री शासन अभिभुखिकरण कार्यक्रम पश्चात गाउँपालिकाले आगामी २०८४ जेठ भित्र गाउँपालिकामा बालमैत्री स्थानीय शासन अवलम्बन गर्ने घोषणा गरिएको गाउँपालिका उद्यम मेजर राईले बताउनुभयो । यसका लागी गाउँपालिकाले उक्त समयावधिमा स्थानीय सरकार सञ्चालन ऐन २०७४, बालमैत्री स्थानीय शासन कार्यान्वयन निर्देशिका २०७८, बालमैत्री स्थानीय शासन घोषणा कार्यविधि २०७९ अनुरूप सेवा प्रवाहका ३६  र संस्थागत १५  सहित ५१ सूचक पुरा गर्ने जनाइएको छ ।

प्रतिबद्धता जाहेर पत्रमा गाउँपालिकाका जनप्रतिनिधि, राजनीतिक दल, बालबालिका प्रतिनिधि, कार्यालय तथा विषयगत शाखा, सेवा प्रदायक संस्था, सामाजिक संघसंस्था, विद्यालय व्यवस्थापन समिति, शिक्षक उद्योगी, सुरक्षाकर्मी, सञ्चारकर्मी, बालविकास संस्था, स्वस्थ्यसंस्था लगायतले हस्ताक्षर गरेका छन ।