भूमि आयोगका २ सदस्यको सपथ, करिव २ सय भूमिहीनलाई भूमि दिनेगरी काम गर्ने नयाँ समितिको प्रतिबद्धता

फागुन २, सोलुखुम्बु ।  सोलुखुम्बुका नवगठित भूमि समस्या समाधान आयोगका २ सदस्यहरूले सपथ लिएका छन् ।  जिल्ला समन्वय समितिको कार्यालयमा आयोजित एक समारोहका बीच भूमि सम्बन्धी समस्या समाधान आयोगका १ विज्ञ सदस्य र १ जना सदस्यले अध्यक्षबाट सपथग्रहण गरेका हुन  । नवगठित जिल्ला कार्य समितिलाई पूर्णता दिने क्रममा समितिका २ सदस्यको जिल्ला समन्वय समितिका प्रमुख कृष्ण प्रसाद निरौलाको प्रमुख आतिथ्यतामा सपथ गराइएको हो ।  

जिल्ला अध्यक्ष नातिकाजी गुरुङले विज्ञ सदस्य जुनितामाया मगर र सदस्य धनकुमार विश्वकर्मालाई सपथ गराउनुभएको छ ।  सदस्यहरूको सपथ समारोहमा प्रमुख अतिथि, जिल्ला समन्वय समितिका प्रमुख निरौलाले सरकारले महत्वपूर्ण जिम्मेवारी भूमि आयोगलाई दिएको बताउँदै सरकारी सबै पक्ष लागेर समाधान गर्नुपर्नेमा जोड दिनुभएको छ ।  उहाँले भूमिहीनहरूलाई भूमि उपलब्ध गराएर राज्य भएको अनुभूति गराउनका लागी नयाँ कार्यसमितिले जोड दिएर काम गर्नुपर्ने उल्लेख गर्नुभयो । सोलुदुधकुण्ड नगरपालिकाका नगरप्रमुख नाम्गेल जाङ्बु शेर्पाले भूमि सम्बन्धी जिल्लामा व्याप्त समस्यालाई समाधान गरेर यो आयोगनै जिल्लामा अन्तिम आयोग बनाउन आग्रह गर्नुभएको छ  ।

यस्तै नेकपा एमालेका अध्यक्ष डुफ कुमार बास्तोलाले भूमि सम्बन्धी समस्या समाधानका लागी नयाँ समितिले महत्वपूर्ण भूमिका खेल्नेमा आफू विश्वस्त रहेको बताउनुभयो ।  कार्यक्रममा बोल्दै भूमि समस्या समाधान आयोगका अध्यक्ष नातिकाजी गुरुङले सकेसम्म यहि कार्यसमितिले जिल्लामा रहेका करिव २ सय भूमिहीनलाई भूमि उपलब्ध गराउनेगरी काम गर्ने बताउनुभयो ।  कार्यक्रममा जिल्ला प्रशासन कार्यालयका प्रमुख अनोज कुमार घिमिरे, जिल्ला स्थित विभिन्न राजनैतिक दलका प्रमुख तथा प्रतिनिधी मालपोत कार्यालयका प्रमुख विदेश खनाल लगायत नापी कार्यालयका प्रमुख एवं अन्य विभिन्न सरोकारवाला निकायहरूको उपस्थिति रहेको थियो ।