जन्मदिनको उपहार, आफ्नो सेवासुविधाबाट कटाएर अध्यक्ष राईद्धारा विपन्न विद्यार्थीलाई छात्रवृत्ति प्रदान

फागुन १६, सोलुखुम्बु । पृथक शैलीबाट जन्मदिन मनाउने क्रममा यस वर्षको जन्मदिनमा साकेला गाउँपालिकाका अध्यक्ष रवि प्रकाश राईले आफूले पाएको सेवा सुविधाबाट माध्यमिक विद्यालयमा अध्ययनरत विद्यार्थीहरुकोलागि सहयोग उपलब्ध गराउनुभएर जन्मदिन मनाउनु भएको छ । उहाँले जन्मदिनको अवसरमा माध्यमिक तहमा अध्ययनरत विपन्न वर्गका विद्यार्थीहरुको कोचिङ कक्षाको शुल्क बापत २४ हजार रुपैंया प्रदान गर्नुभयो ।

अध्यक्ष राईले पाँच वटा माध्यमिक विद्यालयका प्रधानाध्यापकहरु मार्फत एसईई तयारी गरिरहेको विपन्न वर्गका विद्यार्थीहरुको सहयोगको निम्ति छात्रवृत्ति स्वरुप उक्त रकम प्रदान गर्नुभएको छ । सम्बन्धित विद्यालयहरुले दिएको विपन्न वर्गको विद्यार्थीहरुको तथ्याङ्कको आधारमा सो रकम प्रदान गरिएको अध्यक्ष राईले बताउनुभयो । साकेला माध्यमिक विद्यालय रतन्छामा अध्ययन गरिरहेका ८ जना, सरस्वती मावि मात्तिमबिर्ताका ४ जना, राधाकृष्ण मावि बाँझेच्यानडाँडाका ७ जना, बालबालिका माविका ३ जना र सिद्धेश्वरी मावि खिदिमाका २ जना विद्यार्थीको लागि आफूले प्राप्त गर्दै आएको सेवा सुविधाबाट उपलब्ध गराईएको बताउनुभयो ।

यसैबीच, अध्यक्ष राईले आज परेको जन्मदिनकै अवसरमा इलाका प्रहरी कार्यालय मात्तिमबिर्तामा निर्माण भईरहेको दुर्गा मन्दिरलाई एक महिना बराबरको सेवा–सुविधा उपलब्ध गराउने घोषणा गर्नुभएको छ । बजेटको सुनिश्चतता नभएर निर्माण कार्य अवरुद्ध बनेको उक्त मन्दिरलाई चाँडो सक्न आफूले प्राप्त गरेको एक महिना बराबरको सम्पूर्ण सेवा सुविधा उपलब्ध गराउने घोषणा गर्नुभएको हो ।

गत वर्षको जन्मदिनमा समेत अध्यक्ष राईले आफूले पाएको सेवा सुविधाबाट पालिकाका भित्रका २२ वटा बालविकास केन्द्रमा अध्ययनरत २२० भन्दा बढी बालबालिकाहरुलाई एलईडी राईटिङ ट्याब्लेट उपलब्ध गराई बालबालिकासँग खुशी साटासाट गर्दै आफ्नो जन्मदिन मनाउनुभएको थियो । उहाँले आफ्नो जन्मस्थल र आफूले प्रारम्भीक शिक्षा सुरु गरेको चण्डेश्वरी आधारभूत विद्यालयमा पुगेर त्यहाँ अध्ययनरत बालबालिकालाई एलसिडी राईटिङ ट्याब्लेट उपलब्ध गराएर जन्मोत्सव मनाउनुभएको थियो ।