खुम्बु जाने हरेक यात्रुले पालिकालाई  ५० रुपैयाँ बुझाउनु पर्ने ः सामान ढुवानीको शुल्क समेत उठाइने

फाल्गुन ३, साेलुखुम्बु ।    सवारी साधन मार्फत पालिका प्रवेश गर्ने यात्रुबाट खुम्बुपासाङल्हमु गाउँपालिकाले सेवा शुल्क उठाउन थालेको छ । सडक मार्ग मार्फत पर्यटकीय क्षेत्र खुम्बु प्रवेश गर्ने यात्रुबाट प्रतिव्यक्ति रु ५० का दरले सेवा शुल्क र सामानको हकमा प्रति क्विन्टल १० रुपैयाँ उठाउन थालिएको हो । विश्वको सर्वोच्च शिखर सगरमाथा अवस्थित उक्त गाउँपालिकाको सडक मार्ग प्रवेशद्वार रहेको वडा नम्बर १ स्थित खरिखोलामा गाउँ प्रहरीको पोष्ट नै राखेर प्रति यात्रु ५० रुपैँयाका दरले पैसा उठाउन थालिएको हो । गत पौष २० गते बसेको पालिकाको हिउँदे सभा बाटै निर्णय गरेर यात्रुबाट शुल्क उठाउन शुरु गरिएको हो । पालिकाले सडक मर्मत सुधार शुल्क भन्दै यो रकम उठाउन थालेको हो ।

सार्वजनिक सूचना नै जारी गरेर गाउँ प्रहरी मार्फत यात्रुबाटै शुल्क उठाउन थालेको पालिकाका प्रवक्ता लाक्पा छिरी शेर्पाले बताए । उनका अनुसार पालिकाले आर्थिक ऐन निर्माण गरेर नै यो रकम असुल्न थालेको हो । आर्थिक ऐन २०८१ को दफा १३ एवं अनुसूची १२ ब्यवस्था भए बमोजिम पालिका भित्र प्रवेश गरि सञ्चालन गर्ने सवारी साधनबाट प्रतियात्रु शुल्क र सामान ढुवानीको समेत पैसा उठान थालिएको प्रवक्ता शेर्पाले बताए । अब खुम्बु क्षेत्रको खरिखोला प्रवेश गर्नसाथ यात्रुले व्यक्तिगत रुपमा तथा यातायात व्यवसायीले एकमुष्ट रुपमा गाउँ प्रहरी पोष्टमा शुल्क बुझाउनु पर्नेछ ।

सडक मर्मत सम्भारलाई भन्दै यात्रुबाट सेवा शुल्क असुल्न थाले पछि स्थानीय सरकारको भने आलोचना शुरु भएको छ । सरकार भित्रै रहेका वडा अध्यक्ष र अन्य सरोकारवालाहरूले पालिकाको कदमको विरोध गरेका छन् । वडा नम्बर १ का अध्यक्ष फुनुरु शेर्पाले पालिकाले प्रति यात्रु नै पैसा असुल्ने निर्णय गरेर जनतालाई दुख दिने काम गरेको बताए । त्यस्तै कोशी प्रदेश सभा सदस्य गोम्बु शेर्पाले राज्यकै लगानीबाट बनेको सडकमा निजी कम्पनीले सडक बनाए जसरी यात्रु बाट शुल्क उठाउनु गलत भएको बताएका छन् ।  गाउँपालिकाले यस अघि खुम्बु क्षेत्र प्रवेश गर्ने विदेशी पर्यटकबाट पनि प्रतिव्यक्ति २ हजार रुपैयाँ पर्यटन शुल्क भनेर उठाउँदै आएको छ  । उक्त विषय अदालतसम्म पुगेको थियो ।